Cacho di Polis den accion riba presonan arma den KIA
ORANJESTAD(AAN):Den un accion relampago polis mester a haci uso di e cachonan special pa asina pone ordo den KIA. Tres atracador peligroso di ningun forma kier a duna e coperacion necesario. Fiscal, minister di husticia y mando policial a wordo poni na altura di e situacion cu a presenta den KIA. Tur cos a cuminsa den oranan di atardi na momento cu a drenta informacion cu tin preso arma den nan cel na KIA. Mesora top di KIA a notifica polis pa pidi sosten pa yuda. Mirando cu ta trata di presonan peligroso y arma tabata importante pa atende e situacion cu hopi cautela. Polisnan a presenta cu nan cachonan na KIA. A yega na e cel di e presonan y pidi na varios ocasion coperacion pa nan bandona nan cel. Nan no kier a copera.
Tabata atento naturalmente pasobra nan ta arma. Na dado momento despues di basta advertencia a dicidi di manda cachonan riba e presonan. E no a bai facil pasobra e cachonan entrena a drenta y haci nan trabao manera mester ta pa despues polis drenta y pone man riba esnan den cel cu tur comodidad.
Den e proceso dos di e presonan a keda herida cu basta mordi y tabata tin hopi sanger cu a keda atras den e lugar. E di tres preso si a entrega su mes na dado momento. Mester a atende e presonan medicamente mirando loke e cachonan a caba di haci cu nan. Den e cel a haya mas cu un arma skerpi y sumamente peligroso.
Esaki mester ta un señal pa e otro presonan tambe cu mester cuminsa respeta y sigui instruccion di esnan cu tey pa mantene ordo den KIA.
