Caso di supuesto medico Venezolano acusa di causa morto di persona na Aruba, posponi te cu Juli

Publication: Saturday, 14 April 2012. Categoria: General

ORANJESTAD (AAN): E Venezolano Jose G.G.R a presenta dilanti di huez na corte di husticia Diabierna, pa motibo cu el a worde acusa entre otro di causa morto di e hoben di fam Pieters riba 21 di December 2011. E acusacion oficial ta bisa:
J.R ta worde acusa di intencionalmente causa morto di un persona riba 21 di December 2011, door di dune y/of lague tuma un of mas substancia y/of remedi (esta, Madonil pa medio di un of mas injeccion, gel likido di e marca BioFill pa medio di un of mas injeccion, un of mas pildo di antibiotica di e marca Ampicilina di 500 miligram), a consecuencia di cual e persona a fayece.
G.R. ta worde acusa tambe di, den e periodo di 10 di October 2011 te 21 di December 2011 y cu e meta di saca probecho y door di tuma nomber y/of calidad falso y/of door di mañanan y/of un net di mentiranan, a hiba personanan pa pag’e entre 450 pa 1600 Florin, esta, 1 y/of 6 persona of mas pa injeccionnan den cara, 1 y/of 7 persona of mas pa injeccionnan den bil y 1 y/of 3 persona of mas pa sigui curso.

G.R. a haci esaki door di, na un manera intencionalmente falso y/of fraudulento y/of cu astucia, presenta su mes na varios conversacion como medico y/of medico estetico y/of ciruhano estetico y/of ciruhano plastico y/of un profesional medico riba tereno estetico/plastico, y/of a convence e personanan cu e, despues di pago, como dokter por duna nan tratamentonan estetico/cirurgico/plastico, incluso embeyecimento di cara y curpa y/of cursonan, despues di cual el a haci e tratamentonan aki y/of a duna e cursonan, mientras cu e no ta medico, ni medico estetico, ni ciruhano estetico, ni ciruhano plastico, ni profesional medico riba tereno estetico/plastico, no ta registra tampoco como dokter, ciruhano of profesional medico na Aruba y no tabatin mag di haci ningun di e tratamentonan aki na Aruba.

Banda di esaki G.R. ta worde acusa di, den e periodo di 10 di October 2011 pa 21 di December 2011, a saca certificadonan falso na nomber di un y/of tres personanan door di menciona cu e ta dokter y/of ciruhano y/of profesional medico, mientras cu e no ta registra como tal na Aruba.
Fiscal a pidi huez pa pospone tratamento di e caso, mirando cu falta bastante investigacion pa tuma lugar ainda.

Entre otro NFI di Hulanda ta haciendo cierto investigacionnan ainda, relaciona cu causa di morto di e persona.

Fiscal a indica tambe cu O.M a pidi informacion di Jose G.R. for di Venezuela.
El a pidi pa e caso worde posponi te cu dia 13 di Juli.
J.R den corte a pidi huez si e por haya e 600 dollar cu a worde confisca di dje, pasobra e no tin hende na Aruba ni placa.

Fiscal a bisa cu como cu el a worde acusa entre otro di obtene placa na un manera ilegal, e no ta haya cu e mester haya e placa aki back.

Huez tabata di acuerdo cu fiscal y e caso a worde posponi te cu Juli.
Mama di e victima tabata presente na corte tambe y no por a contene su lagrimanan di tristeza, pa perdida di su yiu stima.

Leave a Reply