Concierto di Marc Anthony y Juanes lo atrae mas hende pa Aruba
Durante Aruba International Film Festival…
ORANJESTAD (AAN): Diahuebs atardi na Cas di Cultura a tuma un lugar un conferencia di prensa pa anuncia esnan cu lo ta presente pa e Concert Series di Aruba International Film Festival 2012. Minister Otmar Oduber, kende for di inicio a mustra su sosten pa e festival internacional aki tabata presente pa hunto cu Jonathan Vieira haci e anuncio oficial di presencia di cantantenan renombra.
Asina a informa cu Marc Anthony y Juanes ta confirma pa duna nan presentacion den luna di juni na Aruba.
Jonathan Vieira a duna di conoce cu e tabatin conversacionnan extenso cu Minister Oduber riba e tema aki y a agrega cu aña pasa e mandatario a habri su wowonan un tiki riba ki angulo mas por a mira pa e festival di cine cu ya caba tabata hayando asina hopi atencion internacional den prensa.
Un total di 6 miyon den PR value den medionan di comunicacion internacional a ser logra, mientras cu recientemente a wodo informa cu a haci un total di 2 biyon na impresion.
Pa e film festival tabata bin alrededor di 600 pa 700 hende, pero kier a haci un cambio drastico y agrega e Concert Series. Asina a logra yega na un acuerdo pa Marc Anthony y Juanes ta presente na Aruba y hunto cu nan lo tey tambe Chuckie y Rayman.
Di e forma aki ta atrae mas hende na Aruba y ta brinda un otro posibilidad pa haci algo diferente cu bin wak un pelicula. Pa e motibo ey tambe a tuma e decision cu e conciertonan lo cuminsa 11’or di anochi.
Un peticion cu a worde haci na Minister Oduber door di e organizacion ta pa crea un facilidad di e nivel di e conciertonan aki. Nan a pidi si por utiliza e parti di APA cu ta beklinkerd y e mandatario a reuni cu APA, Directie Scheepvaart, IBSL y Veligingsdienst di Aruba relaciona cu e aspectonan di seguridad cu mester tene na cuenta.
Despues di e reunion aki, Minister a notifica Jonathan Vieira cu elugar ta disponibel y asina pa promer biaha lo tin un actividad asina riba tereno di APA dia 22 di juni cu Juanes segui pa Marc Anthony dia 23 di juni.
Minister Otmar Oduber a duna di conoce cu pa Gobierno ta un honor pa por participa den tipo di actividadnan y eventonan asina grandi cu ta contribui cu e nivel cu ta busca pa atraccion pa nos isla.
E mandatario a expresa cu e film festival a duna e fruto necesario den su promer dos edicionnan mirando e return cu ta haya den medionan di comunicacio, galardonnan cu a haya for di prensa internacional, pero mas cu tur e reconocemento haya den prensa internacional como destinacion durante henter aña.
Awor añadiendo na e film festival pa por atrae un generacion diferente na esun cu ta bin cu e film festival ta trece cune e mix cu ta buscando. Awor no solamente lo haya e prensa cu ta bin hunto cu e film festival, pero tambe bishitantenan cu ta bin pa e concierto. E escohencia di artistanan sigur ta contribui na e meta aki y Minister Oduber a felicita Jonathan y su equipo pa cu esaki.
