Cu e Acuerdo di Cooperacion entre Aruba y Hulanda ta pa profundiza e lasonan cu tin caba
ORANJESTAD (AAN): Acuerdo di Cooperacion cu Gabinete Mike Eman a cera aña pasa cu Hulanda, ta trece beneficio so pa Aruba. Esaki ta e enfasis cu Prome Minister Eman a pone riba dje durante e reunion di Parlamento teni diahuebs ultimo, pidi door di Parlamentario drs. Booshi Wever y fraccion di MEP. Un acuerdo cu lo no costa Aruba nada. E acuerdo ta encera p.e. cu integridad teritorial di Aruba ta worde sigura por medio di e acuerdo aki cu Hulanda.
Si un pais trata di mishi cu Aruba, e isla lo tin e ayudo y proteccion di tur e paisnan miembro di NATO (OTAN).
Cada Arubiano cu su paspoort Hulandes, tin acceso liber na e binti y pico miembronan di Union Europeo. Algo cu hopi otro ciudadano na mundo lo tin gana di por tin e derecho aki.
Mas importante, e Prome Mandatario di Aruba a enfatisa, ta cu tur persona y instancia aki na Aruba tin e acceso na e instancia mas halto di Hoge Raad. Por ehempel na Aruba tin hotelnan cu tin balornan miyonario, y e inversionistanan, door di e relacion di Aruba cu Hulanda, por ta sigur di e proteccion legal di nan inversionnan.
Si pa cualkier locura, trata na mishi na propiedadnan di e inversionistanan, nan por ta sigur cu tin varios instancia legal na cual nan por acudi, cuminsando na esun di Aruba mes cu ta masha bon hinca y ancra. Pero tambe nan tin e garantia di e Corte di Apelacion, y na final e caso por yega te na Corte di Cassacion na Den Haag, cu ta un di e institutonan mas respeta den mundo completo.
E ta worde reconoci mundialmente. Y no ta pornada cu Hulanda a haya confianza di bira sede di un di e Cortenan mas importante na mundo pa husga paisnan mucho mas grandi cu Hulanda mes. Tur esaki pa e siguridad legal cu nan ta ofrece. Pues Aruba tin e privilegio pa garantisa un resultado husto den cualkier dispusta.
Tur esaki pa motibo di ta un miembro di Reino Hulandes, tur e temanan aki ta regla den Statuut. Pesey Aruba a duna asina hopi balor pa fiha su manehonan interno, pero a laga algun tema importante pa worde regla hunto cu Madre Patria, cu cual tin aworaki un relacion di 200 aña. Haciendo esaki den un cooperacion mas grandi, lo trece mas beneficio pa Aruba.
Tur e temanan menciona, ta temanan ancra den Statuut cu a traha cune durante e ultimo 60 añanan. Sinembargo Premier Eman a enfatisa cu tin temanan riba cual nunca a sinta pa trata di profundisa e cooperacion existente caba cu tin cu Hulanda, riba otro temanan cu ta beneficia e isla.
“Ta straño cu den e 200 aña di relacion cu tin cu Hulanda, a firma protocol cu Brasil, Colombia, Merca, pero nunca a sinta cu Hulanda y bisa unda nos por busca beneficio adicional
entre loke cu Hulanda y nos ta haciendo, tratando di busca un sinergia,” e mandatario a bisa.
Y a agrega cu e Protocol no ta kita nada, pero ta ora p.e. a kita ministerio di inmigracion for di husticia di un Minister, ora cu dos Minister Hulandes a bula bin Aruba pa laga un Minister firma cu e no ta Minister di Inmigracion mas y pase pa otro, e ora ta mina autoridad di pais Aruba.
E mandatario a bisa cu pa loke ta e Acuerdo di Cooperacion mes cu a worde firma, nan ta mira cu tin oportunidadnan grandi pa Aruba por sigui crece.
Aruba por ehempel por beneficia di compra di materialnan di school. Si Aruba cumpra su material p.e. di school basico hunto cu Hulanda, enbes di paga 30 euro pa buki, lo por bay paga 20 euro. Simplemente pasobra Hulanda ta cumpra den bultonan grandi, cu ta duna na un miho descuento.
Pero tambe Aruba por uni hunto cu Boneiro, den compra di servicio medico p.e. for di Colombia, cu por beneficia Aruba door cu e gasto aki ta baho. Pues den nada di esaki tin entrega di autonomia.
