Cu PetroChina awe ta dispuesto pa inverti den refineria na San Nicolas y Aruba ta muestra di Trabaonan duro, serio y visionario di Gabinete Mike Eman
ORANJESTAD(AAN): Gabinete Mike Eman ta mustrando di ta e prome gabinete cu exitosamente ta manehando nos pais basa riba un vision di termino largo. Prueba di esaki ta e esfuersonan nunca antes bisto pa drecha schoolnan, casnan pa nos grandinan, careteranan y edificionan di balor cultural, historico y monumental.
Tur esaki pa eleva nos pais na un nivel di “5 strea”, manera por tende tanto Minister President Eman y Minister di Infrastructura enfatisa cada biaha. E idea tras di esaki ta uno di termino largo.
E producto turistico Aruba ta resultado di trabao di varios generacion di expertonan di nos tera mes. Nan a crea, hunto cu partnernan strategico internacional, un vision pa asina nos ta na unda nos ta na e momentonan aki turistica y economicamente. Pero banda di e producto turistico, impresionante, nos pais mes a keda atras.
Socialmente tin problemanan cu no ta cuadra cu e nivel cu nos producto turistico tin. Fisicamente, Aruba no a worde manteni manera un isla di 5 strea. Pa ta mas specifico, ni di 3 of 4 strea. Durante e ultimo gobiernonan di partido MEP, mucho no a worde haci riba e infrastructura di nos pais. “Re-cap” tabata e trabao di mas intensivo cu nan a logra di haci.
Monumentonan a bay perdi y otro edificionan, hopi di nan propiedad di pueblo, a cay den un decadencia pisa. Aki por pensa riba “bestuurskantoor”. Tabata bisto cu propositamente a keda sin mantene pa asina por bisa despues cu no por keda den e edificio y cu mester bandone.
Mescos a haci cu un cantidad grandi di otro edificionan pa na final mester huur un otro edificio for di un famia of amigo.
E ultimo aki, e gobierno di MEP a haci tambe. schoolnan tambe ta un ehempel alarmante di e decadencia di e 8 añanan di gobernacion despues cu partido MEP a tuma poder na 2001. schoolnan tabata cay den otro rond di Aruba.
No tabata na un districto so, si no den tur skina. Cu cambio na caminda despues di eleccion na 2009, sin ta ainda den gobierno, lider di partido AVP a cuminsa un proceso historico. el a pidi pueblo di Aruba ta participe den e prome restauracion di un edificio boluntariamente. For di tur skina di Aruba, ciudadanonan tabata presenta pa duna un man. Otronan tabata presenta cu cuminda, pa esunnan cu tabata traha. Comerciantenan tabata trece material cu nan por a yuda cu n’e. Comerciantenan mas chikito tabata presenta cu awa y ijs. Otronan cu materialnan mas chikito. Aruba a drenta un era nobo.
Un era caminda cu boluntarismo y comunitarismo a bira central. No puntra kico bo pais por haci pa ‘bo, puntra kico abo por haci pa bo pais. Esaki por ta zona simpel, pero e ta un concepto cu hopi biaha ta pasa bay inadverti. Traha pa embeyece nos pais, por ehempel, creando parkenan y restaurando edificionan, manera esunnan di corte y Watertoren na Oranjestad y San Nicolas, ta significa mucho mas cu hopi ta kere.
Banda di ta un asset turistico, e ta un beneficio pa e ambiente general di nos pais. E ambiente den cua nos famianan ta forma y nos yiunan ta crece. Si nos yiunan tin di crece rondona pa edificionan cu ta cay den otro, nan no ta crece den un ambiente pa traha pa yega na miho.
Si nos yiunan tin di worde educa den schoolnan cu ta parce mas un “choller house” cu un centro di avance den bida, e motivacion nunca ta yega na nan curason. Aruba tin un biahe largo su dilanti. Un caminda cu lo beneficia nos pais riba termino largo, structuralmente y conforme cu e meta cu nos tur tin nos dilanti:
“Cada generacion, mester kier y traha pa ta miho cu esun prome.
Y cada generacion mester cuida loke nos grandinan a laga atras pa nan.” Nos comunidad lo no ta unda e ta awe si no tabata tin un refineria cu a haci su presencia parti integral di historia di Aruba. Cuminsando e aña aki, e prospectonan tabata mustra negativo pa e continuidad di e operacion di e refineria pariba di brug.
Pero e vision tras di e trabao di e team dinamico di Gabinete Mike Eman a demostra cu nan dedicacion por worde sobrepasa unicamente pa e amor pa nan pais. Pasando dilanti di bestuurskantoor, mainta, merdia, atardi, anochi, fin di siman of dianan liber, semper tin ministernan kibrando cabes con ta sigui mehora e pais aki.
Y Minister Presiden, Mike Eman, ta un bon ehempel di esaki. E Settlement Agreement, un iniciativa di Gabinete Mike Eman, a worde trata den parlamento na 2010. Lider di e partido di oposicion, MEP, a Sali for di sala pa motibonan cu nunca el a aclaria.
E partido a critica tur aspecto di e Settlement Agreement. Pa nan e no tabata algo cu mester a facilita Valero. Pero nan no a realisa cu e Settlement Agreement tabata un vision riba termino largo.
Un facilitacion pa inversionnan grandi na Aruba. Si en caso un dia e operador, Valero no por sigui mas, e caminda ta habri pa otronan. Awe e frutanan di e vision aki, ta mustra cu seriedad, trabao duro y dedicacion ta na beneficio di henter nos pais.
Cu e partido geel den oposicion kier a demonisa e esfuersonan pa Gabinete Mike Eman por a logra un Settlement Agreement, negociacionnan cu Petro-China of simplemente e stopmento di huurmento di edificionan di famianan, na final tur a proba di ta na beneficio di Aruba. Awe, mundo a lora asina hopi, cu te hasta e partido geel den oposicion, MEP, kier ta parti di e negociacionnan cu nada menos cu… Petro-China. Pa kico? Ta Señora Evelyn Wever-Croes so por aclaria draaimento ilogico aki.
