Diario Online

Delegacion di PetroChina lo bini Aruba pa un siman

Publication: Monday, 23 April 2012. Categoria: General

ORANJESTAD (AAN): Den combersacion cu Prome Minister mr. Mike Eman, el a confirma di a ricibi noticia cu un delegacion di PetroChina lo ta bishitando Aruba otro siman probablemente.
E mandatario a splica cu funcionarionan di Gobierno ta den combersacion cu e Embahadanan pa haci tur e areglonan necesario pa e bishita na Aruba. E miembronan di e delegacion lo bini for di New Jersey, Houston y Beijing. Pues e ta nifica basta trabao pa regla tur e tramitenan aki tog.
Aki na Aruba nan lo haya un bista tecnico di e facilidadnan di e refineria pero tambe lo sinta na mesa cu Gobierno pa fiha cual ta e diferente deseo cu nan tin, reglanan fiscal y labor cu ta vigente.
Door di e diferente combersacionnan telefonico cu a tene cu e ehecutivonan di PetroChina International, por bisa cu ta den un fase basta avansa di e interes cu PetroChina tin.

“Gobierno ta hopi optimista cu for di e negociacionnan cu lo sigui den e simannan cu ta bin aki, lo por realisa un convenio cu lo tin un impacto hopi importante riba e permanencia di operacion di e refineria na Aruba pa hopi aña y hopi decada, pasobra PetroChina ta dispone di crudo den nos vecindario pa hopi decada.

E crudo aki tin cu worde refina y e refineria di Aruba tin e capacidad pa rafina hustamente e tipo di crudo aki cu PetroChina tin acceso na dje. Pesey nos ta hopi contento cu e interes y e oferta cu nan a haci Valero caba, e respuesta ta positivo di parti di Valero. Awor ta cuestion pa nan bin Aruba pa consolida y fortifica e proceso di yega na un acuerdo,” Premier Eman a indica.

A agrega cu tambe lo tin un delegacion di Valero na Aruba den e periodo aki. Apesar cu Gobierno ta optimista, nan ta keda cauteloso mientras cu e cos no ta definitivo; tanten cu no por bisa cu e ta cla. E por bisa si cu Gobierno ta bastante mas alivia cu un par di luna pasa.

E grupo lo ta mas o menos un siman na Aruba. E deseo ta pa na final anuncia con e combersacionnan a bay, pero ta keda na e grupo di PetroChina pa dicidi esey. Pa informa con leu nan a yega. “Ta nos deseo cu den e siman cu e diescuater personanan ta aki, nos por yega hopi claridad con por realisa e convenio cu PetroChina.”

Premier Eman a splica cu Gobierno tin un acuerdo cu Valero cu mientras cu tin un candidato basta serio cu nan ta combersando cune, y cu lo por yega hopi lihe na un proceso di compra, lo traha hunto cu Valero riba un transicion cu no tin efecto pa e trahadonan, pasando over pa e compania nobo. Gobierno ta spera cu e lo no dura demasiado.

Y ta spera cu Valero mantene su posicion cu el a tuma, pasobra esaki ta costa nan placa door cu e refineria no ta draai, pero nan ta realisa tambe cu nan debe esaki na e trahadonan cu ta masha escencial pa continuidad di e refineria. Valero te awor ta cumpliendo debidamente cu nan compromiso haci.