Diabierna a keda cla cu e decretonan di agentenan policial cu tabata wardando riba nan promocion!
Alto Comisario orguyoso, gradici y contento:
ORANJESTAD (AAN) – Den entrevista cu Alto Comisario di Cuerpo Policial Aruba (KPA), señor Dolfi Richardson, el a duna di conoce na Matutino DIARIO, cu e proceso di promocion di agentenan policial a keda cla y den un periodo relativamente cortico. Señor Richardson a indica cu manera ta conoci, KPA a pasa den diferente reorganizacion y esaki ta uno cu a culmina diabierna cu otorgamento di e decretonan na esnan cu tabata tin hopi aña wardando riba esey.
Alto Comisario Richardson a bisa cu e ta hopi orguyoso y contento cu nan por a entrega esaki diabierna, den un tempo relativamente cortico y cu por trece trankilidad y motivacion back den KPA.
El a agrega cu e ta spera cu e producto y servicio policial por mehora cual ta e obhetivo di e promocionnan, na momento cu tin hende contento y motiva trahando den e organizacion.
E ta spera cu e organizacion por ta hopi mas efectivo y cu e smag pa traha brinda servicio na e comunidad tey. Pesey e kier a garantiza esaki cu entrega di e landsbesluitnan locual ta e formalizacion di e base huridico, y esaki pa su coleganan ta hopi importante.
Esaki ta un di opdrachnan cu Alto Comisario a haya for di momento cu el a asumi e responsabilidad aki door di Minister di Husticia, pa traha duro riba dje, y el a gradici tur persona cu tabata envolvi y cu awor KPA tin un structura completamente nobo, un sistema salarial nobo, di rango y di opleiding nobo.
Alto Comisario a expresa cu ta increible e trabaonan cu a wordo desplega e ultimo lunanan aki, y pesey e ta hopi orguyoso di su coleganan tambe y di e diferente departamentonan cu a yuda traha den esaki, pasobra sin nan input esaki no tabata posible y el a gradici nan pa e manera con nan a contribui den esaki.
El a agrega cu 60 porciento di su coleganan ta bay dilanti y mas positivo di esaki ta cu hopi di nan ta bay ocupa posicionnan clave, pa sigui guia e organizacion hoben aki.
Tempo cu nan baha cu pension, nan lo por goza di un pension bon mereci pasobra manera ta conoci e trabao di polis no ta uno facil. El a agrega cu hopi di e polisnan aki ta haya peticion pa nan keda forma parti di KPA, y e ta sigur cu esey lo ta e caso tambe na momento cu e polisnan aki yega nan edad di pension.
Como Mando Policial y Minister di Husticia nan a opta di trece e sistema bieu back, cu cual e polisnan tabata sinti hopi comodo den dje. El a agrega cu nan por bin cu mas polis pero aworaki nan ta bezig pa nan hendenan ta mas eficiente y efectivo.
