Diario Online

Dos predicador laga liber despues cu a haya multa halto pa dollarnan falso

Publication: Tuesday, 24 April 2012. Categoria: General

ORANJESTAD(AAN):Dos predicador a haya nan libertad despues cu nan a pasa den un proceso di interogacion. Segun informa nan tabata tin un suma di alrededor di 3000 dollar di cual den nan un total di 500 mas of menos tabata falso. E predicadornan aki a cambia e dollarnan na Venezuela riba caya of casa di cambio y aki nan a haya un cara abao. Nan ta na Aruba pasobra a bin yuda lanta un iglesia. Nan a bai cumpra cos na Price Smart manera fan etc y ora di paga a resulta cu nan tabata tin dollar falso den nan poder. Polisnan a yega di haya keho caba den pasado pasobra sa tin hende cu a yega di purba paga cu dollar falso na mesun negoshi pero gerencia no ta notifica autoridad. Nan ta djis laga duna e cliente su dollarnan falso bek y despues e chens ta keda cu nan por usanan den otro negoshi perhudicando otro comerciante. Tin negoshi cu ta pone nan trahadornan responsable si nan tuma dollar falso y ta kita e suma for di nan salario. Den e caso aki parce a notifica autoridad y na yegada a detene ambos predicador y hibanan warda. A interoganan y asina a notifica fiscal di ministerio publico na final. Tur cos ta mustra cu no por prueba cu ta intencionalmente nan kier a usa e dollarnan falso.

Asina mes nan a haya un multa di mas cu 1000 dollar y despues a ser manda cas cu e resto di dollarnan cu si tabata bon. Un di e predicadornan so tabata responsable pa e dollarnan falso pasobra e otro no tabata sa di nada y mas bien a acompanja su colega.

Awor nan ta liber bek. No ta prome biaha cu ta haya Venezolano cu dollar falso. Ultimamente te hasta fiscal no ta duna multa despues di e proceso di interogacion. Ta stranjo mes dikon e biaha aki si a duna multa pasobra tres siman pasa un muher cu dollarnan falso a ser laga liber pasobra el a djis declara cu e no tabata sa cu e dollarnan ta falso.

E declaracionnan aki ta suficiente pa fiscal keda sin impone un multa. E biaha aki si e fiscal a dicidi otro y tog a duna un multa basta halto cu mester a wordo paga mesora prome cu nan bai liber.