E aña aki nan tambe ta organiza Fashion Week y Film Festival
Curaçao siguiendo pasonan di Aruba hopi di serca
ORANJESTAD (AAN): Diario por a tuma nota cu Curaçao ta siguiendo pasonan di Aruba, y en especial di Minister Otmar Oduber hopi di serca. Proyectonan cu a carga e sosten completo di Minister Otmar Oduber manera ta e caso di Film Festival y Fashion Week, awor tambe lo tuma lugar na Curaçao. Despues di e exito grandi di e dos eventonan internacional aki na Aruba caminda e Film Festival ta bayendo pa su di tres edicion y tambe e Fashion Week cu a tuma lugar na november ultimo, Curaçao a dicidi di organiza e mesun eventonan. Nan a ripara e cobertura internacional cu tanto Film Festival como Fashion Week a ricibi, un mercadeo di nos isla impagabel, y a tuma e decision di bin cu nan tambe.
Manera ta conoci, e cobertura di prensa internacional di e dos eventonan aki tabata hopi grandi y e resultadonan di dje ta bisto tambe. E Film Festival su cobertura internacional durante su di dos edicion a crece remarcablemente y awor na juni durante su di tres edicion e expectativanan ta mas grandi ainda. Ya caba ta circulando diferente nomber di artistanan grandi cu lo ta presente, y Diario por a compronde cu e siman aki algun di nan lo worde anuncia.
Esaki ta un muestra cu Aruba, y den e caso aki Ministerio di Turismo, Transporte y Labor, bou guia di Otmar Oduber ta un trend setter den nos region. Su vision di diversifica nos turismo, entre otro door di bin cu eventonan grandi cu cobertura internacional manera ta e Fashion Week y Film Festival ta worde admira y den e caso aki imita door di nos hermana isla Curaçao cu ta buscando yega na e nivelnan di Aruba.
Den pasado nunca por a wak algo asina tuma lugar, y awor cu Gabinete Mike Eman, cu e vision di haci nos isla uno 5 strea den tur sentido ta un ehempel den nos region y tur nos desaroyonan ta worde sigui hopi di serca pa asina purba implementanan tambe na otro islanan.
