E turtuganan den e Mar Caribe tin un alianza nobo
Ta trata di Miller Beer
ORANJESTAD (AAN): For di November di e aña pasa WIDECAST (Wider Caribbean Sea Turtle Conservation Network) ta worde gesponsor financiero door di SABMiller. WIDECAST ta e Red regional, cu ta proteha e turtuga di laman den Mar Caribe. E Red ta worde forma door di mas cu 40 pais caribense. Aruba tambe forma parti di WIDECAST. Pero tambe lokaal e turtuganan, “island locals” for di hopi tempo caba, lo por conta cu sosten di Miller. E distribuidor di Miller Lite na Aruba, Pepia Est NV. a delibera cu Turtugaruba, e Fundacion cu ta proteha e turtuga marino na Aruba. Hunto nan a dicidi pa haci algo pa tur “Island locals”, turtuganan i hende na mesun tempo.
Manera ta conoci polucion ta un di e peligernan mundial mas grandi awendia, pa hende i tambe pa e turtuganan. Hopi animalnan ta muri anualmente door cu nan ta come plastic. Imaginabo e caso di e Driekiel (Leatherback Sea Turtle), e turtuga mas grandi di mundo. Su cuminda preferi ta jellyfish (kwal). Anto un saco di plastic cu ta drif den e awa di lama, kico e ta parce ?……
Pesey Turtugaruba ta masha contento cu Miller Lite lo sponsor dos baki di sushi na Eagle Beach durante un aña. Diamars 3 di April e bakinan a worde batisa door di Ludwig Estrada i Herdy ten Lohuis di Miller Lite/ Pepia Est NV, door di Stanley Brown di Clean Master i voluntarionan di Turtugaruba.
E baki di “Island locals” ta complementa bakinan similar cu a worde poni caba e siman aki door di TPEF (toerismefonds).
Turtugaruba ta spera cu mas organizacion/companianan lo sigui e ehempel.
Pero e protagonistanan pa evita polucion riba beach i den awa ta nos mes, ami i abo, hendenan local i tambe turistanan.
Nunca “lubida” sushi riba e beach! Haci bon uso di e bakinan percurando cu tur “Island Locals” tin un futuro duradero na Aruba.
