Home Editorial Fiesta cu e desgracia di otronan!

Fiesta cu e desgracia di otronan!

0
1
SHARE
- Advertisement -

No tin otro manera di bise: MEP, den su afan pa purba gana tereno politico riba loke sea, ta di fiesta cu e posible clausura permanente di e refineria na Aruba. Ningun otro consideracin a ser tuma na cuenta, solamente e idea cu e ida di e refineria lo significa un daño temporal na e progresonan grandi cu e Gobierno di Mike Eman a bin ta logra desde cu el a inicia su tanda di gobernacion. Di cu un gran cantidad di hende lo perde nan entradanan, directa o indirectamente obteni for di e funcionnan di e refineria, no ta parce di ta importante pa esnan cu ta celebrando caba un fiesta macabro cu e ciere definitivo di e refineria. E ta tipifica un tipo di mentalidad cu no a cambia y no ta parce di por cambia tampoco, amen di e lider cu ta na turno, pasobra esun cu a sali ta nenga di desaparece den su ignominia, y esun cu a yega no ta parce di tin e bolunad pa dal un virahe na e rumbo fatalistico cu e otro a impone durante tanto decada.


              Lo cierto ta cu Mike y su ekipo ta haciendo lo imposible pa purba mantene e portanan di e multinacional habri, y ta sigui inverti placa, energia y esfuerzo den purba logra loke na e alturanan aki ta parce dificil di obtene: un socio dispuesto di duna un man pa mantene e portanan di cero colorado habri pa e operacionnan di e refineria.

             Por lo menos nan a demostra di tin e interes di Aruba y di su Pueblo na pecho, pasobra a pesar di e critica di tanto viahamento, nan a persisti den e afan di busca un solucion practico pa e problema.

                Valero di su parti a haci loke cualke multinacional lo a haci den su lugar, o sea trata di defende e interesnan di su accionistanan. Si Aruba sali beneficia di cualke logro, enhorabuena, pero pa nan no ta parcemi cu e ta e punto cardinal di nan gestionnan o pasenshi o cooperacion den e buskeda di un solucion pa e refineria.

              Ademas, nan no a proba di ta mes leal cu nan ‘socionan’ manera nan a pretende na un principio, y tin hopi di nos cu por duna testimonio di esey. Poniendo un banda tur lo demas, e importancia di e refineria pa Aruba ta grandi, pesey Mike y su ekipo a cana e extra miya pa busca un solucion unda cu ta pa e problema; si nan no a logra te awor no ta pa falta di interes di nan parti, esey ta categorico.

               E asunto no ta cu Aruba no por sin e refineria, sino cu e lo ta un yudanza grandi den e recuperacion o mantenimento di e stabilidad economico-financiero di e isla. Sin dje casi henter e peso ta bay cay riba turismo y otro factornan periferico, y den esey nos ta relativamente bon para, danki na un Ministro superactivo, o sea Otmar Oduber.

                 Banda di dje bo tin un Mike de Meza y un Benny Zevinger cu ta igualmente capaz y efectivo den nan ministerionan. O sea cu na total di cuenta, Aruba ta conta cu un Gobierno hopi eficaz, dirigi pa un Prome Ministro consciente di su debernan, dedica na su tarea di percura pa su Pueblo y su isla. Ban spera di tur manera cu na ultimo hora lo bin un solucion practico pa e refineria, y si e ta di cera su portanan mes, nos lo mester enfoca riba loke su ciere por significa pa e caha di Gobierno, pasobra den e construccion mescos cu den e desmantelacon di un industria tin hopi di gana mescos cu di perde. Ta depende di e enfoke cu kier dune y e rapidez y efectividad cu cual e ser haci.

                 Mi ta sigui confia cu e gestionnan di Mike y su ekipo lo por produci e milagro di mantene e refineria habri, apesar di tur e contratemponan y e aparente felicidad di esnan cu ta pustando politicamente riba su ceramento definitivo.

                Ban mantene nos dedenan cruza y nos curazonnan yen di optimismo cu nos lo sa di sali di e percance aki tambe, mescos cu nos a sali exitosamente di esun cu a acontece nos tempo cu Lago a cera.

- Advertisement -

1 COMMENT

  1. mientras abo ta wak den cura di otro , otro ta drechando bo cura, AVP ta na mando no por tira culpa riba MEP mas, pasado a keda den historia , awe ta un dia pa hasi cos productivo y mjn ta e futuro pa AVP drecha asina ta stop di pp di MEP y cuminsa traha pa peublo, cumpli cuy promesa nan , BBO, BRANDSTOFCLOSURE, BAHA AWA Y CORIENTE ENZ ENZ.

DUNA COMENTARIO

Please enter your comment!
Please enter your name here