Havenstraat e druppel???
Analisis politico
ORANJESTAD (AAN): Aparentemente e ceramento di Havenstraat door di DOW a habri wowo di nos ministronan. Mientras mas cu mita di ecayanan di centro di playa ta cera pa motibonan incomprendibel DOW a dicidi di cera e ultimo caminda cu tabata habri ainda.
Un locura mas pio ainda cu e drama di De La Sallestraat. Parce cu por fin wowo di nos gobierno a habri y kizas hasta ta mira awo con ridiculo DOW ta trahando desde AVP a drenta gobierno. Pesey pa corda hende un rato ta e mesun hefenan ta maneha DOW cu a para fiesta, dal bitter ariba e brug di Marisol un par di aña pasa. E brug cu a worde contrui contra tur conseho sin presupuesto mucho caro solamente pa favorece ruman muher.
E top di DOW tabata di fiesta hunto cu e gobernantenan di MEP celbrando cabamento di e brug. Ta e mesun hefenan aki tin Oranjestad y pafo na werki cu por ta solamente un meta nan dilanti. Esey ta pa e gobierno di AVP worde mal mira. Ningun momento hende por kere cu nan falta di capacidad of conocimento pa haci un miho trabao.
E ceramento di Havenstraat por a habri wowo di nos minsitronan pasobra den e caso aki no por tin un splicacion cu por mustra cu a actua di buena fe. Ta tristo pasobra e gobierno aki ta invertiendo miyones di Florin pa drecha nos pais den e sentido mas amplio di e palabra pero ta worde boycotia malignamente door di ambtenaarnan cu te den nan higra parce di ta MEP.
Nan mes a prueba cu nan por si. Nan tin De La Sallestraat cera pa casi un aña pero ora cu nan a cera e ultimo pida ciudadanonan a bira loco contra e pida caminda cu trafico mester a pasa y e protesta tabata asina grandi cu e hefenan di DOW a cuminza teme pa nan bida. E ora ey si di anochi pa mainta literalmente di anochi pa mainta nan a construi un caminda di dos avenida perfecto. Kier meen cu nan por si ora cu nan a spanta di e reaccion hopi fuerte contra tanto malicia. Loke nan a haci cu e crusada di Caya Ernesto Petronia y De La Sallestraat mester worde studia y describi den un buki pa hende siña kico kier meen goberna cu un parti di e aparato di gobierno contra bo.
Esaki pa gobiernonan den futuro por mira tur e trikinan cu ta sali for di esnan cu kier nan minsitronan malo. Cada biaha casi ta bin storianan standard manera mester a coba mas tempo pasobra a rijs raiznan di matanan cu nan no tabata sa di dje. Ora nan a gasta simannan largo cu e storia di mata ta bin e argumentonan cu repentino a bin topa cu tubonan di awa cu antes no tabatey. Otro lunanan pa nan ta sinti cu nan ta proteha contra critica pasobra nan no por a anticipa cu diripiente tin tanto tubo cu a aparece ariba nan. Ministronan contento cu nan atrobe pasobra nan no por a sa cu tin tanto tubo scondi bao di tera. Tin biaha nos ta kere cu ta MEP mes a sconde nan eybao.
Ora cu excuus di tubonan traicionero a caba nan ta yama e minsitronan pa nan bin mira cu nan propio wowo con bao di e tubonan di awa tabatin wayanan di Elmar scondi cu a haci hasta cu e trabao a bira peligroso y cu mester laga e inginieronan di Elmar bin soluciona e problema di e kabelnan. Elmar ta bin topa cu e kabelnan ta worde menaza door di e raiznan di e matanan cu ainda tey y cu ta keda na bida door di e leaknan den e systema di riool. Esaki ta pone cu e caminda cu na otro pais ta worde asfalta y drecha casi den un anochi a duna DOW e spacio pa tortura nos pueblo cu nan inventonan pa lunanan largo. Desde e prome simannan cu e gobierno nobo a sinta DOW a cuminza cu su campaña. Nan a cuminza cera e entrada mayor di Caya Grandi pa 6 luna pa pone ni 100 meter di baksteen.
Despues e drama mes a sigui cu awe por mira cu casi henter centro di Oranjestad ta cera. Tin caminda cera solamente pa irita hende pasobra ningun trabao ta worde haci ainda. Nos ta spera seriamente cu e intento ultimo di DOW door di cera Havenstraat a habri wowo di nos gobernantenan cu ta puro mente maligno di MEP ta ocasionando e drama caminda mester tabatin alegria pa e gran trabao cu gobierno ta haci.
