Homber a keda pega bou di su pickup den accidente frontal na Noord
ORANJESTAD (AAN): Diadomingo anochi Polis a haya notificacion di un desgracia riba e caminda di Noord pa Sabana Liber. Algo pasa di 9or y mey di anochi chauffeur di Toyota pickup blanco cu number A-43712 a perde control y bolter despues di impacta frontalmente den un Hyundai Elantra color silver cu number A-15038. E homber den e pickup a keda pega bou di su vehiculo. Polis a cera ambos banda di caminda. E hoben chauffeur tras di stuur di e Hyundai tabata levemente herida. Personal di Ambulance a yega e sitio y stabilisa e herido bou di e pickup mientras Brandweer tabata man yen purbando di saca e homber for di e chasis cu a para cay riba dje.
E homber di edad grandi tabata keha di dolor y move hopi haciendo labor di personal di emergencia mas dificil. Brandweer cu jack a logra subi e auto suficiente pa por a saca e victima pega bou di e pickup. Un biaha e homber los for di su auto a subie riba strecher y hibe den Ambulance direccion dr. Horacio Oduber Hospital.
E situacion di e chauffeur ta uno delicado pa cual specialista di trafico y departamento tecnico di Polis tambe a yega na e sitio. E pickup a keda confisca pendiente mas investigacion.
