Investigacion di Lotto pa Deporte ta pa Fraude di coriente

Publication: Wednesday, 18 April 2012. Categoria: General

Contrario na rumor cu e caso tin di haber cu credit card y lipstick
Endy, Ricky y Frederick Croes ta den problema serio!
ORANJESTAD (AAN): Awor cu e sospechosonan principal a cuminsa basha abou riba otro, e caso a cuminsa haya forma y husticia tin un miho bista di kico ta sosodiendo den e investigacion penal relaciona cu e caso di Lotto pa Deporte. Un cos ta sigur, e caso no tin nada di haber cu e Rapport di Ernst & Young, sino mas bien cu falsificacion di recibo y malversacion di placa. Te unda e tres sospechosonan ta gelink na otro, awor ta bou di investigacion di Landsrecherche.
E caso mes a cuminsa haya forma dia 23 di augustus 2011 ora cu Landsrecherche a detene Frederick “Shlomo” Croes. E tabata e electricien cu ta haci trabaonan pa Fundacion Lotto pa Deporte. Sin participa na ningun sorto di destaho publico, e tabata haya tur e proyectonan cu e fundacion ta envolvi den nan. Interesante ta cu e ta haya e proyectonan directamente di e fundacion mes, pues sin cu e mester pasa via e contratistanan. Tambe e fundacion mes tabata controla su trabaonan, pues nada di e ingenieronan cu tabata tin supervision riba cada proyecto.


E problema cu e compania aki, FAC Electrical a cuminsa desde e proyecto di construccion di e casino den aeropuerto.

Aki nan a cobra Fundacion Lotto pa Deporte e suma di Afl. 450.000,00 pa instala 150 stop contact den e localidad, pues sumando Afl. 3.000,00 pa cada stop contact! Aki mesora a sali na cla cu algo no tabata cuadra, pasobra e prijs ta mucho mas halto cu mercado.

Pa por investiga e prijsnan bon, a pidi dos compania renombra di coriente pa duna un cotation pa e mesun trabao. Un di nan a cobra Afl. 70.000,00 y un otro a cobra Afl. 90.000,00 pero cu a inclui coremento di wayanan di data pa computer. Pues, si e prijs real tabata Afl. 70.000,00 kende(nan) a goza di e demas Afl. 380.000,00 cu a paga dimas?? Aki ta caminda cu awor recherchenan ta purbando, of a logra descubri e “link” entre e trio aki.

Ora cu a cuminsa revisa e recibonan entrega y paga na Frederick Croes, a bin topa cu algun recibo di Kooyman cu e mesun descripcion pero cu sumanan diferente di otro. Polis a bay Kooyman pa controla e recibonan y aki a bin topa cu e realidad cu tur e recibonan tabata falsifica. Kooyman a sigura cu Frederick Croes a uza logo robez riba e recibonan cu e kier a aparenta di Kooyman, a uza number di recibo cu no ta existi y a pone productonan cu nan no ta ni bende eyden.

Ta cu esey riba mesa a detene e electricien pa falsificacion di documento y malversacion di placa pasobra door di falsifica e recibonan e por a cobra e fundacion hasta 3 of 4 bez mas caro cu normal!

Pero ta zona casi imposibel pa un solo hende por haci algo asina sin haya cooperacion for di paden di Lotto pa Deporte mes. Specialmente pasobra e tabata entrega su recibonan mainta y pa merdia mes e por a busca su check! Contrario na e proceduranan di control den cual cada pago por dura mas o menos 2 siman prome cu e check por ta cla. Mester tin un motibo pa administratie di Lotto pa Deporte “by pass” riba regla pa un solo hende cobra mesora y riba TUR su recibonan.

Kizas esey mes ta e motibo cu dia 14 di september 2011 a laga detene e ex director financiero di Lotto pa Deporte, esta Ricky Croes. Su rol como e homber di placa y e “controller” den e fundacion ta precisamente pa verifica tur pago y controla si ta tene nan mes na procesonan fiha den nan departamento financiero.

Segun nos informacion, Ricky Croes a declara na Landsrecherche cu e no sa di nada y cu e tabata haya ordo “di ariba” pa e paga y pesey e tabata cumpli. Kico mas Ricky Croes a declara no ta conoci, pero e caso no a keda te eynan. Riba 11 di april 2012 a detene Endy Croes, ex director general di Lotto pa Deporte, pa e mesun acusacionnan cu e dos otronan, esta pa malversacion y falsificacion.

Kico e dos otro sospechosonan a declara y con nan declaracion ta incrimina Endy Croes lo mester sali afo awo. E hecho cu Huez Comisario a laga prolonga su detencion cu 8 dia mas ta un indicacion cla cu tin mester di mas tempo pa keda cla cu e trabao di investigacion andando.
Un cos ta sigur, tin mas hende cu tin cu carga nan responsabilidad den e caso aki.

Specialmente pasobra Endy Croes tabatin un posicion masha poderoso den e fundacion. E tabata e Presidente di e fundacion, a tuma su retiro bira director general, pero nunca mas nan no a apunta un presidente nobo. Como tal, e demas miembronan di directiva awor lo mester duna cuenta di con por ta posibel cu nan por a permiti semehante situacion den e maneho financiero di e fundacion.

Cada un ta personalmente responsabel pa e situacion cu a presenta y no por descarta cu lo tin mas detencion pa cay den e dianan nos dilanti.

Leave a Reply