Home General Lotto mester dedica su mes na loke ta su tarea

Lotto mester dedica su mes na loke ta su tarea

2
0
SHARE
- Advertisement -

Segun Minister de Meza:

ORANJESTAD    (AAN):   E periodo cu e trahadornan di Fundacion Lotto pa Deporte tabata tin pa pasa over pa e Fundacion pa Maneho di Facilidadnan Deportivo a transcuri. Mientrastanto ya caba tabata tin vacaturanan cu a keda publica.

   Esnan cu no a firma, pa falta di garantia, ta tratando di busca un caminda legal pa toch duna nan mas tempo pa pasa pa e Fundacion nobo. Di otro banda partido MEP ta bisa cu tin cantidad di post cu no tin claridad riba e placa.

   E Minister encarga cu Fundacion Lotto pa Deporte ing. Mike de Meza a splica den un declaracion cu prome cu a trata e presupuesto y Nota di Cambio tabatin diferente decision y palabracion haci entre su persona, Conseho di ministronan y Minister di Deporte, y e informacionnan aki a worde pasa pa Direccion di Finanza.

    Den e Nota di Cambio a pone 4.3 miyon cu ta bay pa maneho di e facilidadnan deportivo, placa pa e trahadonan cu ta traha na Lotto pa Deporte cu ta traha na e facilidadnan deportivo y algun proyecto cu tin directamente di haber cu e facilidadnan deportivo.

   E mandatario a sigui splica cu a bisa basta tempo caba cu lo tin cambionan grandi den Lotto pa Deporte, caminda e fundacion mester bay dedica su mes na su “core business” , esta loteria. A deshaci di casino na aeropuerto, pasobra e no ta nan negoshi. A yega na un convenio pa pasa esaki pa Triple A.

    Lotto pa Deporte tampoco lo no bay tin nada di haber cu subsidio, ya cu esaki ta un competencia di Minister di Deporte, cu ta esun encarga cu maneho di deporte. E ehecutivo aki ta esun cu mester responsabilisa su mes na Parlamento pa e placa uza. Pues e sistema lo no bay ta manera antes, caminda cu Lotto por duna subsidio pa loco na ken cu ta. Lotto mester percura pa nan tin un bon administracion, cu bon premionan y paga su debenan. E placa cu resta ta bay pa Ministerio di Deporte.

    Tambe a dicidi cu Lotto lo no bay ta encarga mas cu maneho di facilidadnan deportivo. A dicidi di lanta un fundacion cu a keda encarga cu e maneho di e facilidad y pa esaki nan lo tuma hende den servicio, e mesunnan cu tabata traha cu Fundacion Lotto pa Deporte. Lotto no por carga e gastonan ey mas, door di e situacion precario cu nan a keda aden. Pesey e restructuracion den e organizacion di Lotto pa Deporte caminda a refinancia nan debe.

    A crea un relacion mas estrecho cu e partner Canades. Pero no ta berdad cu Lotto a worde bendi. Solamente a bay hunto riba mercado bancario pa busca un refinanciamento. E mandatario a bisa cu na fin di aña lo keda demostra cu e decision cu a worde tuma ta esun corecto.

- Advertisement -

DUNA COMENTARIO

Please enter your comment!
Please enter your name here