Minister Otmar Oduber a mustra riba strategianan moderno pa haci di Aruba un destinacion di calidad halto
Durante conferencia di ATCA
ORANJESTAD (AAN): En coneccion cu e Annual Tourism Conference for North America (ATCA), Minister di Turismo, Transporte y Labor, Otmar Oduber a trece dilanti e importancia pa engrandece e Producto Aruba, cual no ta solamente riba nivel infrastructural, sino tambe riba nivel humano, aspecto cu Minister ta considera hopi importante.
Pa e motibo aki Ministerio di Turismo hunto cu Aruba Tourism Authority (ATA) como tambe Eseñansa pa Empleo (EPE ) a cuminsa cu e programa di certificacion (Aruba Certificacion Program) aña pasa. E programa aki ta destina primeramente pa esnan laborando den e ramo hotelero, pero cu ta beneficioso pa pueblo completo sigui. E programa aki su proposito mayor ta pa trece concientizacion riba e Producto Aruba y mustra e orguyo y unidad di e pueblo Arubano. E Aruba Certification Program ta carga cune e campaña di “Mi Compromiso”, cual ta un campaña di consientizacion basa riba e pregunta “kico bo compromiso cu Aruba ta?”.
Teniendo pueblo di San Nicolas na mente, Minister Oduber a inicia un festival cu ta tuma lugar tur diahuebs, e Carubbian Festival. Di e forma aki Minister kier sigura cu turistanan lo bisti ta e area aki di Aruba promoviendo nos cultura, musica, arte y cuminda local y alaves yudando economia di San Nicolas. Carubbian Festival ta demostra di ta un existo, e website renombra www.smartertravel.com a nombra Aruba entre e top places to visit in the world y Carubbian Festival “not to be missed”.
Pa haci Aruba mas atractivo Aruba ta organizando diferente eventonan internacional manera Soul Beach Festival, Caribbean Sea Jazz Festival , Latin Music Festival como tambe e Aruba International Film Festival y Aruba in Style, cualnan ta worde reconoci mundialmente.
Cu eventonan asina Minister Oduber kier usa stategianan moderno pa haci Aruba un destinacion di calidad halto, generando cobertura den medionan internacional.
