Mucha chikito di 3 aña bibando cu su tata Turista den Chollerhouse
Caso serio na San Nicolas
ORANJESTAD (AAN): E informe aki cu a worde suministra door di Cuerpo Policial, ta pone hopi hende pensa y sacudi cabez.
Increibel pero berdad! Con un tata por hinca den su cabez pa bay biba den Chollerhouse cu su yiu muher di tres aña.
Situacion por ta asina malo? Of e tata no tabatin conocir, of hende, of instancia pa bati na nan porta pidi yudanza? Mas ainda cu a keda slenter cu un criatura di tres aña pa colmo un mucha muher den Chollerhouse na unda por tin tur clase di malesa.
Tabata diamars a drenta un tip valioso cerca polis, tin un homber y un mucha chikito ta den Chollerhouse. Polis a bay mesora na e choller house den Palisiaweg y enberdad a resulta cu ta asina.
E polisnan a atende e homber di inicialnan C.B. di 26 aña naci na Canada.
E homber Canades, a declara di ta hunto cu su yiu muher menor di edad y ta biba temporalmente den e Chollerhouse, debi cu e no tin placa mas pa biba riba Aruba.
Tambe el a declara di a perde su pasaporte!
Polis a menciona den nan rapport policial, cu na momento di a analiza e situacion, a lanta sospecho mesora cerca e agentenan, ora nan a atende e homber, y a haya sospecho cu e por ta un drogadicto.
E criatura tin varios herida na curpa! Polis a mira herida di ringworm na cara y henter su curpa y tambe e ta den mal salud. E hecho cu e lo no ta hayando suficiente alimento cu proteina y mineral, tin su efecto riba su sistema di digestion. Tur esey segun e rapport di polis ta menciona.
Agentenan a actua mesora, y Polis a hiba e homber y su yiu chikito rumbo pa Warda di Polis relaciona cu e situacion deplorable.
Control haci via di IASA a resulta cu e Canades ta ilegal riba Aruba. E mucha muher a worde examina pa enfermero John Henriquez.
Mientras voogdijraad tambe a worde envolvi y tambe personal di Slacht Offer Hulp pa busca solucion pa remedia un situacion hopi lamenta.
E pregunta grandi” Unda e mama ta? Di con e no bay Sociale Zaken, of Voogdijraad? Ni sikiera Consulado? Di con net den Chollerhouse?
