No por a inscribi den e padron electoral pasobra “e sistema tabata down” mientras Chavistanan si a inscribi!

Publication: Saturday, 14 April 2012. Categoria: General

Venezolanonan no Chavista no a guli e pildo!
Despues nos a bolbe haya yamada cu tin un grupo di e personanan cu kier a inscribi cu a bay manifesta den e Consulado y pa nos manda un reportero. Na momento cu nos reportero a bay, no tabata tin ningun hende pafo di e Consulado y un meneer Angulo a bise cu no tin nada cu tur cos ta trankil, pues “Aqui no esta pasando nada”!
Ni cinco minuut despues cu nos reportero a bolbe DIARIO, nos a haya mas yamada pa manda un periodista cu por tuma un relato y saca potret, pasobra nan ta wardando den e di dos piso. Cos cu señor Angulo no a bisa nos reportero. E ora ey e reportero hunto cu un periodista a bay e Consulado en busca di informacion. Ora nos a drenta señor Angulo a retene e camara di nos colega. Mientras tanto e periodista a subi na e di dos piso, y akinan mientras el a purba di entrevista un di e personanan cu tin e keho, e Consul encarga cu prensa a bin cu esey no ta un lugar pa haci reportahe, cu e ta un falta di respet, mientras otro señora a bin papia cu e periodista cu un tono di voz nada agradable, mientras cu ningun momento nos a falta respet ni a bin cu grito.

Un rato despues e tal señor Angulo a subi y a bisa e periodista pa bay abao cune. Nos a kere cu e ta bay duna nos un entrevista tocante e situacion, pero no. Como cu e grabador tabata cendi pa entrevista un dama, cu un actitud amenazante e homber a pidi e periodista pa scrap kico tabata tin graba.

E periodista di DIARIO a nenga rotundamente, pasobra e dama cu ken nos kier a combersa no por ni a habri su boca pa dun e minimo declaracion debi na e manera con e “diplomaticonan” a reacciona. Pero nan manera grosero di papia cu nos di DIARIO si a keda graba, y esey nan kier a obliga nos delete bao amenaza di Angulo cu e ta bay lanta un caso contra nos Matutino.

Ta suppose cu e consulado ta cera pa 4.30’or di atardi. Como cu e periodista di DIARIO a keda pafo, wardando e salida di e personanan cu kier a inscribi y cu tabata tin keho, nos a ripara cu pa 4.15’ or ya caba nan a cera e porta principal na lock. Personanan cu ta traha te 4’or di atardi a bay bati porta di e consulado. Un di nan a worde bisa cu e sistema a “down” y otro dos cu a yega un tiki despues a keda bati porta y ningun hende a habrie pa nan.

E personanan aki a keda preocupa pasobra nan no sa si “e sistema lo drecha” diasabra of diadomingo cu ta e delaster dia di inscripcion, pasobra nan ta desea di uza nan derecho di voto, pero nan ta mira cu esey lo worde imposibilita.

Tabata obvio cu e derecho di expresion ta ausente den e Consulado. E consulnan a haci di un vruminga un baca, pasobra DIARIO no a haci nada fuera di lugar. Ta simplemente cumpli cu nos trabao di a bay busca informacion, purba papia cu e personanan cu a mustra nan disgusto y cu un Consul pa balansa e informacion.

Un consul cu ta tribi di kita e camara di un reportero ta ki clase di formacion diplomatico e tin? Un consul cu ta lanta stem pa un periodista cu a yega na un manera pacifico atendiendo un yamada di ciudadanonan Venezolano, ta ki sorto di diplomatico ta? Un consul periodista cu ta atende cu relacionnan publico, cu ta yama un periodista di DIARIO pa falta di respet pasobra el a bay cumpli cu su tarea, despues di varios intento di haya informacion via telefon, ta ki clase di derecho di expresion y mas ainda, ki sorto di libertad di prensa e ta eherce?

Ni sikiera nan propio compatriotanan cu no ta comulga cu e gobierno na mando tin tampoco e derecho di manifesta den prensa nan disgusto! Bunita democracia, no? Finalmente, masha danki na e “diplomaticonan” concerni, di e Consulado de la Republica Bolivariana de Venezuela, pa practicamente a saca nos porta pafo y mesora cere na lock. Un actitud berdaderamente anti-diplomatico!

3 Responses to 'No por a inscribi den e padron electoral pasobra “e sistema tabata down” mientras Chavistanan si a inscribi!'

  1. April 14, 2012 at 3:22 pm
    Casildo Werleman
  2. April 16, 2012 at 12:17 am
    B. Croes
  3. April 16, 2012 at 8:03 am
    Albert1

Leave a Reply