Parlamentarionan Andin, Marisol y Mervin a reuni tocante proyecto traimerdia pa hoben
ORANJESTAD (AAN) – Matutino DIARIO a tene un entrevista cu mr. Andin Bikker, lider di Partido Democracia Real (PDR), kende a comenta cu Gobierno a tuma diferente punto cu el a presenta den su presupuesto alternativo, y hunto cu su coleganan sras. Marisol Lopez- Tromp y Mervin Wyatt- Ras, a bin cu algun amienda, cu tambe a wordo hinca den otro den e cambionan cu gobierno a adopta. Bikker a agrega cu ta bunita cu mayoria den Parlamento a aproba e sumanan pa bin cu cierto proyectonan, pero mester bin contenido y ehecucion di e proyectonan aki.
Diahuebs atardi a cuminza cu e prome ciclo di reuni cu personanan cu lo por bay participa na e proyecto similar na traimerdia, pero pa hobennan di school secundario, cu ta uno cu sra. Marisol Lopez- Tromp a bin cune tempo cu e tabata Minister, y tempo cu a trata e presupuesto a pone fondonan pa bin cu un otro proyecto piloto.
Diahuebs tabata tin e prome reunion y nan a pensa di invita, entre otro, Minister di Enseñanza, pa e bin Parlamento duna nan informacion con e ta bay duna contenido na e amienda aki cu a wordo adopta for di Gobierno.
Bikker ta kere cu esaki ta un bon inicio y un direccion nobo den Parlamento, unda cu no solamente ta bin cu amiendanan pa loke ta trata presupuesto pero ta duna contenido y ehecucion na e amiendanan aki.
Parlamentario mr. Bikker a informa cu el a papia caba cu Minister di Energia pa duna un siguimento, entre otro, na ELMAR pa loke ta trata e meternan prepago y e rebaho di invoerrechten riba airconan inverter.
