PetroChina ta papia di un “win-win situation” pa ambos partido
Minister Mike de Meza
ORANJESTAD(AAN): Si PetroChina yega na un acuerdo riba compra di Refineria di Valero na San Nicolas, esaki ta nifica cu nan presencia na Aruba ta pa un periodo largo. Esaki ta loke por a sinti for di e grupo durante e diferente combersacion cu a sostene cu nan. Minister di Finanza, Energia y Utilidad Mike de Meza ayera mainta, na final di reunion cu e delegacion di PetroChina, a bisa cu tabata un orguyo pa su persona participa den e reunion di ayera riba un tema asina importante pa Aruba, bou guia di lider Mike Eman. E reunion cu e corporacion di azeta mas grandi na mundo, na opinion di e mandatario, tabata uno sumamente positivo. PetroChina, el a splica, ta un compania masha grandi mes cu ta procesa mas cu 3 miyon bari pa dia, sobrepasando Shell y Exxon. Un compania serio cu tin 13 aña di existencia.
Nan track-record ta sumamente bon y tambe e direccion cu nan a tuma. Esaki ta un bon partner y positivo pa Aruba, principalmente si mira kico e ta trece cu ne. Aunke de Meza no por a bay mucho den detaye, e mandatario a bisa cu e beneficionan cu PetroChina lo trece pa Aruba sigur ta positivo. “Nan tin un balor grandi pa Aruba y region.”
Gobierno anterior a sinta cu Petro-China, y nan no a gusta nada e manera con nan a worde trata e tempo ey. Esaki a worde expresa na Gobierno di Gabinete Mike Eman tambe ora cu a topa pa prome biaha. Pues un relacion dificil, dificultad den comunicacion y un trato no mucho bunita.
Den e reunion di ayera esaki a keda ripiti atrobe y ta demostra cuanto daño personanan arogante y intransingente por causa. Pio si ta lidernan di un pais. “E ta lastima pasobra e daño tabata grandi. Awe por mira con e compania ta sinta na mesa cu e actual Gobierno, ta discuti ampliamente y semper ta papia di un win-win situation.
Un situacion cu ta na beneficio di ambos partido.” Minister a agrega cu e “settlement agreement” a yuda tambe, manera cu el a yuda tambe pa Valero opera e refineria durante e ultimo dos aña. Pesey e mandatario no por a keda sin critica esnan cu a abstene di vota riba e settlement agreement y hasta a papia cu Gobierno ta sinta cu diablo na mesa.
El a finalisa bisando cu ta importante pa semper sinta na mesa cu otro cu respet, caminda ta crea un “win win situation” pa ambos banda.
Pa ilustra e situacion, Prome Minister Eman a bisa e delegacion, momento cu nan a papia di e “gap” cu a worde causa den e comunicacion entre nan y Aruba, cu mas grandi e “gap” ta, mas bunita e brug ta bira.
