Diario Online

PetroChina tog a demostra di kier tin un compromiso cu Aruba pa un termino largo

Publication: Tuesday, 24 April 2012. Categoria: General

Ing Mike de Meza: Ingredientenan cu tur cos tey pa decisionnan grandi pa refineria e siman aki
ORANJESTAD (AAN):Yen di expectativa Minister di Finanza y Utilidad ing. Mike de Meza ta spera yegada di e delegación di PetroChina cu lo ta yegando Aruba pa combersacion y negociación cu Gobierno di Aruba. E informe inicial ta papia cu nan ta yega diaranson, pero den un declaración ricibi for di Minister de Meza, ta indica cu e delegación di PetroChina lo ta yegando Aruba Diamars, procedente di Beijing (China), New York y Houston. Mientras cu e delegación di Valero lo yega e siman aki tambe. E desaroyo ta mustra positivo, según e mandatario. Gobierno e siman aki lo sinta cu e delegacionnan pa papia riba e diferente posibilidadnan y decisionnan mester wordo tuma relaciona cu e refinería di Aruba.

 Te aworaki, e mandatario a enfatisa, tur cos a bay sumamente positivo, pa cual e por bisa cu Aruba lo sali di e menasa di cierre di e refinería, y lo logra un acuerdo cu lo beneficia tur hende. Pues e lo ta positivo pa Aruba.

Aunke cu e acuerdo no a wordo firma ainda, tur e ingredientenan tey pa logra algo positivo pa Aruba. “Nos lo yega na decisionnan grandi,” Minister de Meza a bisa. Y a splica cu Gobierno ta prepara pa ora cu sinta na mesa, discuti y negocia loke cu PetroChina lo por trece dilanti, hunto cu e partnernan di Aruba.

“Tur hende sa cu pa Aruba e refinería ta importante, specificamente pa San Nicolas e ta sumamente positivo y bon pa e refinería sigui procesa y en general pa e economía di Aruba. Si mira e mas di 4 mil cupo di trabou cu e refinería aki ta brinda, tur hende ta comprende cu lo ta masha importante pa Gobierno haci tur lo posible pa restablece e operación di e refinería ….,” e mandatario a splica.

Minister de Meza a bisa tambe cu e tin un sentimento cu PetroChina tog a demostra di kier tin un compromiso cu Aruba pa un termino largo, y pa algo serio. E ta basa su mes riba e reunión personal cu e tabatin cu gerencia di PetroChina International na New Jersey y e diferente combersacionnan telefónico cu e tabatin cu diferente ehecutivo di e compania.

Y a recorda cu un compania manera PetroChina, cu a bira esun mas grandi di mundo, ta un partner sumamente atractivo pa Aruba y lo tin bon resultado na fin di dia. PetroChina lo cuminsa su bishita cu un bishita di inspección na e refinería. Pero después lo sinta na mesa cu Gobierno di Aruba, y su conseheronan, caminda lo papia riba e diferente convenionan cu ta existi.

Y naturalmente di ambos banda, tin e posibilidad pa trece puntonan cu kier aclaración riba nan, of preocupacionnan tambe cu por ta existi. E anuncio positivo lo por wordo haci, pasobra e ingredientenan tey, y tin hopi trahado ta en espera di un bon noticia. A pesar cu e refinería no ta operación, e trahadonan di Valero ta trahando ainda.

E mandatario tambe tabatin masha palabra di elogio pa e parti di due-diligence cu Valero y PetroChina ta anda cune pa bin cla cu tur cos.