Premier Eman contento cu presencia di funcionarionan di Eucarinet na Aruba
“Si Aruba por haya un pro mille mes di e fondonan nos ta keda contento”
ORANJESTAD(AAN):Eucarinet, e plataforma crea door di Union Europeo pa dialogo cu Caribe, tin sumanan grandi disponibel poni den un fondo destina pa uso entre otro di estudionan cientifico. Sumanan cu Aruba tambe por haci uso di nan, haciendo esaki pa medio di e proceduranan cu mester tene cuenta cu nan. Pa duna un splicacion con Aruba por haya acceso na e fondonan aki, Gobierno a trece Aruba dos funcionario di e organisacion pa duna un tayer y informacion na stakeholders con pa traha raportnan cu peticion.
E dos expertonan aki, Koos de Korte y Daphne van der Zande, a yega Aruba ayera y mesora a presenta den un conferencia di prensa hunto cu Prome Minister Mike Eman na Europahuis.
E mandatario a señala na inicio di e conferencia cu ta masha importante cu e conferencia aki a tuma luga na Europahuis, ya cu di e manera aki ta enfatisa e importancia di e relacion entre Aruba y Hulanda y na su turno Union Europeo. E fondonan ta importante, pero den e relacion di Aruba cu Hulanda y Union Europeo, no ta mira solamente e fondonan cu tin disponibel, pero tambe e hopi otro posibilidadnan strategico cu tin debi na e posicion geografico unico di Aruba den region cu por wordo bon usa na bienestar di miembronan di Union Europeo, direccion Latino America y vice versa. Aruba por forma e brug entre e dos continentenan cu cua e tin relacion pa hopi tempo caba, debi na e bentaha cu nos tin di conocemento di e cultura di ambos y di por comunica bon tambe cu e dos bandanan diferente aki, birando un tipo di mediador entre e dos continentenan.
Den nomber di Gobierno Premier Eman a gradici e funcionarionan masha hopi cu nan a bin Aruba pa yuda stakeholdernan cu informacion con haci miho uso di e fondonan cu Union Europeo ta pone disponibel. Ya caba TNO hunto cu Aruba a entrega un peticion. Gobierno ta kere cu hunto cu TNO por forma un partner importante pa Union Europeo creando un desaroyo nobo riba tereno di investigacion, caminda ta haci uso di fondonan cu tin disponibel pa desaroyo di tecnologia nobo.
E informacion cu e mandatario a ricibi ta mustra cu di e periodo di 2007 te cu 2013 tin un suma di algun biyon euro cu ainda no a wordo usa, mientras cu pa e siguiente periodo cu ta vence na 2020 lo bay tin 80 biyon euro disponibel. “Sumanan grandi y si Aruba por haya solamente un pro mille di esaki ya caba ta algo grandi ….” Premier Eman a agrega cu e ta kere cu tin hopi oportunidad hustamente riba e tereno cu comercialmente no por wordo desaroya ya cu no sa kico e ganashinan ta bay ta, caminda mester haci investigacion y crea e tecnologia. Union Europeo tin paketenan di sosten cu Aruba por haci uso di nan.
Premier Eman a expresa di ta masha contento cu e organisacion, logistica, cu a demostra di e manera aki cu Aruba por bira e punto central caminda discusionnan ta wordo hiba riba uso di e fondonan cu Union Europeo tin disponibel. “Esaki ta un bunita ehempel,” e mandatario a indica.
Koos de Korte ta consehero financiero di Departamento di Asuntonan Economico, Agricultura y Inovacion di Hulanda y ta na Aruba como representante di Eucarinet tratando di crea un laso entre UE y Caribe pa traha hunto na desaroyo di e region y solucion di problemanan cu por surgi na Europa.
Pa loke ta e seminario di ayera cu a tuma luga na Universidad di Aruba, esaki tabata pa duna un splicacion di e programa 7de Kader, e programa di subsidio cu su fondo, cu tabata 50 biyon euro, no a wordo usa completamente ainda. Na mesun momento lo papia di e programa nobo “Horizon 2020” cu ta bay tin 80 biyon euro disponibel pa e periodo di 2013 pa 2020. Lo bay mustra organisacionnan na Aruba con por yega na e fondonan aki, pa ki tipo di proyecto e fondonan ta disponibel, etc. En principio tur persona na mundo por participa den e programa aki, pero e mester ta dirigi riba tecnologia. No tin un suma specifico poni pa region sino e ta bay pa cada proyecto cu ta wordo otorga y loke ta wordo duna ta basa riba e raport cu a wordo traha di kico kier logra. Den cuadro di esaki, Prome Minister a bisa tambe cu si e raportnan cu Aruba entrega ta bon hinca den otro, por realisa diferente proyecto hunto cu Hulanda y Union Europeo riba desaroyo di tecnologia. Mas ainda mirando cu Aruba ta creando un nomber riba tereno di inovacion. Daphne van der Zande, e otro funcionario di Eucarinet y consehero di e programa 7de Kader ta presente na Aruba, a bisa cu tambe ta existi e posibilidad cu un persona por haya un beca pa e “promoveer” pero e mester cumpli cu cierto condicionnan, entre otro mester realisa esaki na un otro pais na Europa y riba cierto temanan tecnologico specifico. Esaki ta aparece riba un lista di e pais caminda e lo por tuma luga.
Durante e siman cu e dos delegadonan di Eucarinet ta na Aruba, nan ta bishita entre otro Santa Rosa, EPI y Universidad di Aruba.
