Proyecto piloto di DIMAS conhuntamente cu CENSO, Gabinete di Gobernador y Direccion di Finanzas finaliza cu exito!
Mas di 400 “arubiano nobo” a haya carta di restitucion di deposito for di DIMAS na momento di aplica pa e paspoort hulandes na CENSO
ORANJESTAD (AAN): Den luna di december di 2010 un grupo grandi di residente di Aruba cu ta procedente di diferente pais rond mundo a haci uzo di nan derecho pa aplica pa bini na remarca pa e nacionalidad Hulandes. E aumento repentino den e cantidad di aplicante cu a surgi tabata debi cu e ley, na nivel di Reino cu ta regarda e otorgacion di e nacionalidad Hulandes, a conoce cambionan entrante januari 2011. E solicitante pa e nacionalidad Hulandes mester pasa e examen den dos idioma awo, Papiamento y Hulandes.
Te cu luna di december di 2010 e idioma den cual e solicitante por a scoge pa pasa e examen tabata Hulandes of Papiamento. Alrededor di 1600 hende a aplica na december 2010.
Den 2011, despues di a colecta conseho y informacion di diferente departamento, a manda tur aplicacion pa Gabinete di Gobernador pa IND, cu ta e instancia cu finalmente ta tuma un decision referente e solicitud pa e nacionalidad Hulandes.
Recientemente e prome grupo di mas di 400 persona cu a solicita pa e nacionalidad Hulandes den luna di december 2010, a ricibi nan decreto di Reino durante un ceremonia di naturalisacion.
Hunto cu e decreto nan a ricibi un invitacion – conteniendo un cita pa pasa na BBSB/Censo pa aplica pa e paspoort Hulandes. DIMAS a percura pa traha pa tur e “Arubianonan Nobo” cu tin un deposito paga, e carta di restitucion.
Grato tabata e sorpresa pa e personanan cu a ricibi nan carta di restitucion di DIMAS na oficina di BBSB/Censo. Considerando e exito di e proyecto piloto y despues di su evaluacion, DIMAS conhuntamente cu Gabinete di Gobernador, Censo y Direccion di Finanzas ta preparando pa otorga e carta di restitucion na e siguiente grupo grandi di persona cu ta bay naturalisa proximamente.
E di dos grupo ta un poco mas di 200 persona y e intencion ta pa otorga e personanan e carta di restitucion durante di e ceremonia di naturalisacion mes. Clientenan contento y satisfecho, ta un satisfaccion grandi pa DIMAS. Pa formularionan of otro informacion, por bishita www.dimasaruba.com of pasa na DIMAS personalmente y un di nos empleadonan lo ta cla pa atende’bo.
