Reunion entre Minister Otmar Oduber y chauffeurnan di autobus tabata uno exitoso
“Minister Oduber tin boluntad pa yuda y tur chauffeur ta hopi contento cune”
Declaracion di Albert Angela, chauffeur di autobus 19
ORANJESTAD(AAN):Dialuna mainta despues di a regresa for di exterior, Minister Otmar Oduber a reuni cu chauffeurnan di autobus cu ta core ruta di San Nicolas. Manera ta conoci, siman pasa e chauffeurnan aki a bay Bestuurskantoor pa haya aclaracion riba e cambionan tumando lugar den Arubus caminda cu lo bin cu un total di 15 autobus nobo. E trahadornan honesto aki a haya mal informacion tocante e uso di e autobusnan y a kere cu nan pan lo ta na peliger cu e desaroyo nobo aki.
Minister Mike de Meza, remplazando su colega di Transporte a ricibi e chauffeurnan y a indica cu asina Minister Oduber regresa, el lo sinta cu nan na mesa. Demostrando su transparencia y lucha pa bienestar di pueblo Minister Oduber a reuni cu e chauffeurnan riba prome dia di trabou cu e ta bek na Aruba.
E reunion aki a bay den forma ameno unda cu Minister di Transporte hunto cu chauffeurnan di autobus a dialoga riba e mal comprendimento cu tabatin riba e reorganisacion di Arubus.
Despues di e encuentro, vocero di e chauffeurnan di autobus, Albert Angela, di autobus 19 a comenta cu e ta hopi contento pasobra nan a haya e reunion hopi liher y a bay den un hopi bon ambiente.
“Mi ta mira cu e Minister aki ta un Minister cu tin boluntad pa yuda y el a splicanos con e cosnan ta hinca den otro”, Sr. Angela a duna di conoce. El a indica tambe cu Minister Oduber ta un minister dinamico cu tin boluntad pa regla asuntonan y pesey tur e chauffeurnan ta hopi contento cune.
Chauffeurnan tabatin entendi cu lo introduci 31 autobus nobo, cual no ta e caso. Minister Oduber a splica cu Arubus a cumpra 16 autobus y no 31. 15 autobus lo core rutanan cu na e momentonan aki ta wordo cori dor di busnan grandi pero cu no ta produci suficiente entrada, como tambe algun ruta cu e autobusnan independiente no ta coriendo na e momentonan aki. For di e 16 autobusnan nobo cumpra 1 lo wordo usa como spare, en caso cu un di e 15nan daña.
Pues no ta e caso cu lo tin 16 autobus riba caya coriendo rutanan nobo,y mucho menos 31 manera contrincantenan politico a indica. Minister Oduber tambe a sigura e chauffeurnan di autobus independiente cu DOPV lo tene control estricto pa ningun autobus di Arubus core rutanan cu no a wordo destina pa nan.
E mandatario a expresa di ta compronde e situacion dificil cu e chauffeurnan di e autobus independiente ta pasando aden pa cu e falta di necesidad di transporte publico riba e ruta di San Nicolas, pa cual motibo Minister lo reuni cu 5 representante di chauffeurnan independiente pa dialoga y scucha sugerencianan riba con lo ta e mihor manera pa alivia e situaccion aki.
Chauffeurnan di autobus a expresa palabranan di gradicimento na Minister Oduber y a bisa cu nan ta sinti cu Minister Oduber ta un Minister hopi dinamico y cu bon boluntad . Nan a keda sumamente contento cu Minister Oduber a scucha y kier yuda alivia nan preocupacionnan
