Reunion entre Santa Rosa, Parke Nacional Arikok y criadornan di bestia tabata sumamente exitoso
ORANJESTAD (AAN): E resultado ta cu Minister Oduber conhuntamente cu Conseho di ministronan a bay di acuerdo pa introduci un comision consistiendo di Criadornan, Santa Rosa, Parke Nacional y representante di ambos Ministerio, pa conhuntamente sondea e solución positivo. Diasabra ultimo, Santa Rosa cohuntamente cu representantenan di Parke Nacional Arikok a reuni cu e criadornan di bestia di Aruba. Mester remarca cu un grupo di mas di 100 criador a atende e reunion cu a tuma lugar na Club San Martin na Santa Cruz. Pa exactamente 7or e moderador a duna inicio na e reunion.
E panelistanan a consisti di Señora Nathalie Maduro, Miembro di Management Team pa DLVV Santa Rosa, Sr. Roberto Croes, Chief Planner pa Santa Rosa, Sr. Roy Maduro, Director pa Parke Nacional Arikok y Sr. Jimmy Meijer, Marketing & PR Manager pa e parke.
E anochi a consisti di varios puntonan di agenda, ya cu esaki tabata un reunion informativo na unda cu Santa Rosa a anuncia e diferente proyectonan cu lo bay tuma lugar den e proximo lunanan pa sigura un mihor cooperacion entre e Departamento y e Criadornan di Bestia.
Señora Maduro a splica e necesidad grandi cu tin pa cuminsa cu un registro oficial di tur criador di bestia y tambe Cunukero cu lo bay tuma lugar proximamente. Di acuerdo cu Señora Maduro, e informacion aki ta crucial pa Santa Rosa por ehecuta un planificacion a largo plazo y pa por haci calculonan nessecario na momento di cumpra equipo y material pa ser rebendi na e criadornan di Aruba na un prijs preferencial.
Tambe Santa Rosa kier instala un fundacion cual lo carga e nomber “Amigonan di Santa Rosa” cu lo sirbi como un tipo di cooperativa pa sostene e criadornan optimalmente na momento cu mester cualkier ayuda of sosten.
“Tin hopi fondonan internacional cu ta financia proyectonan di agricultura y cria y e fundacion aki lo sirbi pa busca e tipo di fondonan aki pa asina por inverti den proyectonan beneficioso pa tur miembro di e fundacion”.
Na entrada un a tuma nomber di tur e criadornan cu a atende e reunion y lo bay yama cada uno individual pa haci e registro via telefon pa asina sigura cu nan tin informacion di tur criador. Esnan cu no por a atende e reunion, ta aprecia si nan por tuma contacto cu Señora Glenda Bareno na 5858102 pa asina nan tambe por duna e informacion necesario.
Kier remarca cu e informacion aki lo worde trata riba un base confidencial y lo no ser comparti cu ningun otro Departamento of institucion. E plan ta tambe pa introduci un carnet di indentificacion y Santa Rosa lo pidi cooperacion di sector priva pa mediante e carnet aki, e miembronan por haya descuento riba articulonan cu no ta ser bendi na Santa Rosa como algun di e beneficionan cu e fundacion lo introduci pa su miembronan.
Mester remarca cu e reunion a bay den un manera sumamente pasivo na unda cu cada grupo a haya e oportunidad pa expressa nan preocupacion, ideanan y sugerencianan. E prome paso cu lo ser tuma, ta un registro oficial di tur criadornan di bestia y tambe tur cunukero di Aruba y aki den Santa Rosa lo haya un bista cla di ken ta tur e criadornan cu tin bestia den parke y tambe cuanto bestia tin actualmente den e parke.
Santa Rosa lo continua cu e tipo di reunion nan asina cual sigur ta beneficioso pa tanto Santa Rosa como e criador y cunukeronan, ya cu esakinan tin hopi informacion valioso cu por worde usa pa un planificacion a largo plazo pa e bienestar general di agricultura y cria na Aruba. Pa e motibo aki tambe, Santa Rosa ta pidi tur criador y cunukero pa por fabor tuma contaco cu Señora Glenda Bareno pa por registra nan informacion y pa keda pendiente pasobra pronto lo organiza un reunion cu tur Cunukero di Aruba y ta spera cu e biaha aki por conta cu e presencia di un representante di DIP pa contesta tur pregunta encuanto di e huurgronden, e beleid nobo cu tin y tambe e ley di ROP.
Pa medio di esaki Minister Otmar Oduber y Santa Rosa ta gradici tur criador cu a atende e reunion diasabra anochi na Club San Martin y comparti asina hopi información valioso y importante. Tambe ta gradici Sr. Roy Maduro y Sr. Jimmy Meijer pa nan participación y pa nan splicacion encuanto di e structura y preocupacionan di Parke Nacional Arikok.
“Ban sostene nos Cultura, practica Cria, Pesca y Agricultura”
