Home General Segun Diego de Cuba STA tin demasiado trabao pa cana horta miembronan...

Segun Diego de Cuba STA tin demasiado trabao pa cana horta miembronan di FTA!

2
1
SHARE
- Advertisement -

Rudy Geerman mester busca e fout den su mes:
ORANJESTAD (AAN) – Matutino DIARIO a acerca señor Diego de Cuba, presidente di Sindicato di Trahadornan di Aruba (STA), ken tin su reaccion relaciona cu e declaracionnan di e presidente di FTA, cu ta bisa cu e sindicato aki ta horta su miembronan.
Diego de Cuba a subraya cu STA no ta cana horta miembro di ningun sindicato y cu FTA no ta un sindicato sino e “Federacion di Trahadornan di Aruba” cu a wordo lanta cu e meta aki, pero nunca el a fungi como un Federacion. Segun de Cuba e declaracionnan di Rudy Geerman ta sorprende STA, y mas ainda cu e ta bin tilda su persona di cana horta miembronan di FTA.
El a indica cu tempo cu STA a cuminza haya miembro tabata na prome lugar door di Arugas y ta pa peticion di e trahadornan mes cu a acerca STA; e sindicato a cuminza crece y a drenta Wegenbouw, Thiel Corporation, Thiel Resources, ALBO, Hyatt, Dutch Village, APA NV, ATA, y tambe SERLIMAR, entre otro.

Segun e sindicalista, e trahadornan aki tabata tin un dolor y nunca nan a wordo scucha pa Rudy Geerman, y si e ta pretende cu STA ta un sindicato bao di palo, kiermen cu e sindicato bao di palo aki ta haci FTA hopi dolor, y Geerman no mester worry cu esaki pero mester worry pa scucha su miembronan y percura pa haci su trabao manera mester ta.

“ Nos ta preocupa pa nos miembronan, pa nan haya un bon contrato colectivo, y pa zorg pa tur locual ta concerni nan derechonan laboral wordo respeta y ehecuta, mescos cu nos ta bisa nos miembronan cu nan tin nan debernan tambe cu mester cumpli cu nan”, Diego de Cuba a expresa.
Diego de Cuba a señala cu actualmente STA ta representando 19 compania den un temporada di apenas dos aña, unda cu nan a crece y nan tin hopi trabao pa desplega pues, nan no por preocupa nan cabes cu e declaracionnan fofo di Rudy Geerman.

Y e ta kere cu si FTA ta perdiendo miembronan ta pa su mes falta, y no por culpa STA di esey ni acusa e sindicato di ta horta su miembronan, locual absolutamente no ta berdad.
“ Mi ta un hende cu tin cu traha ocho ora pa dia y plus traha pa e sindicato. Mi no tin e tempo di Rudy Geerman, cu ta disponible e 24 oranan pa dia, y cu e por dedica e tempo aki na su miembronan”, de Cuba a expresa.

El a agrega cu Rudy Geerman meter wak si mes dilanti un spiel y puntra su mes kico el a haci pa su miembronan, cuanto compania y cuanto trahadornan el a laga na caya, sin a scucha nan nunca, y e ora ey si e por saca su propio conclusion.

“ STA lo sigui crece no obstante e declaracionnan di Rudy Geerman, pasobra nos no ta bay baha cabes cu e bobadanan aki, pero nos ta sigui dilanti. Por cierto, aworaki nos a termina cu e CAO di Triple A, un di e mehor Contratonan Colectivo cu nos a logra den e ultimo añanan”, De Cuba a subraya.

Pa ultimo el a manda palabranan di danki na Minister di Labor cu a manda dos inspector na un resort unda tabata tin referendum recientemente, y cu e presencia di e dos inspectornan aki a evita intimidacion. E sindicalista ta haya cu e mandatario a haci un bon trabao y cu e tabata bastante efectivo.

- Advertisement -

1 COMMENT

  1. Rudy wak kiko boso a hasi prome cu papia . Na Radisson casino boso a worde paga pa 11 anja largo sin cu nan por a hanja un contrato colectivo.F.T.A. noooooit meer

DUNA COMENTARIO

Please enter your comment!
Please enter your name here