Ta pidi disculpa na clientenan pa tur inconveniencia
Operacion na N.V. Elmar ta normaliza atrobe
ORANJESTAD (AAN): Ya ta algun dia caba cu sindicato U.E.A. ta den discusion cu gerencia di N.V. Elmar relaciona cu algun punto di salario, orario di trabao y areglo medico pa un colega specifico. Un ke otro a desemboca den un accion cu a pone cu N.V. Elmar no por a sigui brinda e mesun nivel di servicio na su clientenan. Diaranson atardi gerencia di N.V. Elmar a reuni cu directiva di sindicato U.E.A. na oficina di Mediador di Gobierno. Ey a propone pa e sindicato U.E.A. stop e accion mientras cu a pidi gerencia di N.V. Elmar pa para e caso sumario cu a entama pa diabierna awo.
Diahuebs mainta atrobe e sindicato a sigui den reunion pero a logra convence e miembronan cu mester reanuda trabao pa asina evita casonan den Corte. Pa 10or di mainta e trahadonan a cuminsa traha back y asina N.V. Elmar por a cuminsa brinda servicio normal na su clientenan.
Dor di e accion, diahuebs mainta a opta pa cera e sucursal na San Nicolas y na Hato pa falta di trahado, mientras cu a mantenee oficina principal den Wilhelminastraat habri, pero brindando tur servicio normal.
Gerencia di N.V. Elmar ta spera di por sigui dialoga cu e sindicato na mesa, evitando accionnan innecesario cu ta afecta e nivel di servicio cu e compania di distribucion di coriente mester brinda na su clientenan. Ta parce cu empleadonan a compronde esaki y awor ta dispuesto pa continua cu dialogo, pero sin cu mester ta para pafo.
Hecho ta cu e empleadonan cu un CAO awor ta bogando pa un aumento di salario, cu no ta inclui den e contract di trabao, cu lo tin un efecto grandi den e presupuesto di N.V. Elmar. E punto di bista di gerencia ta cu lo mester sinta dialoga, semper y cuando saliendo for di e punto di bista cu tin un CAO vigente caba valido te cu otro aña.
