Arte y Sciencia (FAS) di Universidad ta informa esnan cu tin interes den un carera den Trabao Social
ORANJESTAD (AAN): Facultad di Arte y Sciencia (FAS) di Universidad di Aruba, ta invita tur esnan cu tin interes den un carera den Trabao Social pa un asina yama “Academic Experience” riba dia 30 di mei promixo di 4.30 pa 6.30 di atardi.
Otro luna e deadline pa registracion ta sera y por medio di e experiencia Academico ta duna tur esnan interesa e oportunidad pa “purba” kico e estudio Trabao Social ta. E participantenan ta haya chens pa participa den tres (3) les y tambe lo tin un exposicion chikito di studiantenan cu ta sigui e programa di estudio caba.
Den e lesnan cortico aki, atencion specifico lo ta riba un grupo di enfoque y tin un les di e modulo “Introduction to Social Work Practice”. Tambe lo tin un les practico cu ta duna un idea di con ta prepara pa pasantia.
E programa di estudio “Social Work and Development” (SW&D) ta un di e programanan di estudio di e Facultad di Arte y Sciencia (FAS) cu a inicia na 2009. E ta un programa di estudio di 4 aña riba nivel di “Bachelor” y e studiante ta worde prepara entre otro pa duna asistencia na individuonan, famia y gruponan.
E studiantenan ta worde prepara tambe pa traha y haci actividad den comunidad o pa organizacionnan. Tambe e studiante ta worde prepara pa haci investigacion (research) den e area Social pa atende cu o siñala problemenan Social cual resultadonan por ta instrumental pa e desaroyo di maneho y leynan na Aruba. E estudio ta un estudio general pa Trahador Social y esaki ta nificia cu tur Trahador Social cu gradua di e programa por traha cu mucha, hoben, adulto o hende grandi.
Tur esnan cu ta interesa sea adulto o hoben ta invita pa atende e “Academic Experience” aki. Esnan cu ta desea un carera cu tin hopi involvimento cu e ser humano cu tin retonan riba tereno fisico, psicososial y/o social-emotional ta worde especialmente invita.
