Aruba ta ocupa puesto No. 1 di mundo di taza mas halto di Belasting
Awor e ta na 58.95% y tempo di MEP e tabata hasta 60%
ORANJESTAD (AAN): Aruba su nomber semper ta sali bunita den foyetonan di turismo, den encuestanan pa haya sa cual tin e beach mas bunita, y tambe como e destinacion preferi pa parehanan tene nan luna de miel.
Pero un informe cu a circula internacionalmente, sigur lo bay spanta tur potencial inversionista cu kier bin habri negoshi of haci algo na Aruba!
Esey ta awor cu a sali na cla, cu Aruba tin un di e tazanan mas halto di impuesto na mundo!
E compania KPMG a haci un encuesta di 96 pais durante 2011, y asina a logra saca un lista di cual pais tin e taza di impuesto mas halto. Prensa Mericano den fin di siman a logra traha e Top 10 lista, cu tin e taza di mas halto.
Number uno? Esey a resulta di ta Aruba! E unico isla of pais den henter continente Americano, cu a aparece riba e lista. Nos taza di impuesto awor na 2011 ta na 58.95% pa hende soltero. Esnan cu ta casa tin un taza mas abao, esta di 55.85 porciento.
E texto ta indica, cu na aña 2007, tempo di gobernacion di MEP, e taza tabata aun mas halto, esta di 60 porciento.
E taza di belasting aki, ta mucho mas halto cu e promedio di henter Caribe, cu ta na 26.7 porciento. Islanan manera Bahamas, Bermuda, y Cayman Islands no tin belasting di entrada tampoco.
Esnan cu ta yega mas cerca di Aruba den continente Americano ta Argentina, Colombia, Ecuador, Guatemala y Venezuela. E taza aki ta di 31% te cu 40%. Merca mes ta na un taza di 35%.
Number 2 riba e lista ta Suecia, sigui pa Dinamarca na di tres, Hulanda na di cuatro lugar cu taza di 52%. Despues ta sigui cuatro pais empata na (5), esta Austria, Belgica, Japon, y Reino Uni. Na di (9) lugar tin Finlandia, y na di (10) lugar tin Irlanda.
No a tende ningun hende duna reaccion ainda riba esaki. Pero Servicio di Impuesto si a manda un nota pa tur hende, corda registra cualkier propiedad inmobil pa Impuesto di Grondbelasting.
Banco
Wel gobierno…baha roomtax, subi BBO y baha loonbelasting….Y sigui fiesta!!!
Tuma nos haci
Bisami con un persona cu tain un loon belasting asina halto , despues cu e ricibi su salario netto den su man … mester paga WEB Y Elmar un schat di plaka !! despues mester paga hypotheek (interes super halto) cumpra cuminda (no tin control di prijs )y paga gasoline cu a baha 2 cent … con e Arubiano por biba???