Atraco Team y TBP a gara atracador peligroso
ORANJESTAD (AAN): Diasabra mainta trempan e miembronan di TBP y tambe Atraco Team di cuerpo policial a pone man riba un atracador peligroso. Dos atraco el a comete riba mesun dia. E ta ser sospecha di a comete e atraco arma riba e apartamento di placer “Nos Lugar” na Mei Veld algun dia pasa. Tambe el a fracasa den un atraco riba algun turista di edad na altura di e parada di bus pazuid di hospital. Den e ultimo intento aki un di e turistanan a kibra su pols. Tabata un taxista cu a duna nan un man mesora y hiba e turistanan hospital. E atracador mes a huy for di e sitio.
Pa mucho tempo e no a keda liber pasobra diasabra mes esnan di atraco team y TBP a yega na e cas na San Nicolas y pone man riba dje. E detencion no tabata facil. E sospechoso a huy for di e sitio na careda pero e agentenan a bay su tras na pia pasando den Rooiweg, Diamantbergweg y finalmente mande tera banda di Colegio Arubano na San Nicolas.
Aki ta trata di un conoci di husticia Bryan Lionel Singh. A trece warda di polis na Playa caminda cu e lo pasa den e proceso di interogacion. E tabata comete su actonan pabao di brug y bay sconde na San Nicolas. Esey no a stroba e agentenan di cruza brug y buske pariba.
E maneho di accion rapido di polis riba casonan manera esaki ta loke Alto comisario y minister di Husticia ta bogando pe tambe. Pesey mes personalmente nan tin contacto regular cu e teamnan aki pa asina haya un bista riba e trabaonan cu nan ta haciendo y ta aprecia tambe como hefenan di e agentenan aki.
Nortero
Bon trabau di nos cuerpo policial. Pero lastima cu aki un paar di dia e ta kana rond atrobe i atraca hende atrobe.