Castigo di 2 aña y mey pa diferente atraco cometi riba hende riba caya
ORANJESTAD(AAN): Diabierna Jhoan A.B.V y Broderick V.C a presenta dilanti di huez, pa haya sa e veredicto den nan caso.
Nan a wordo acusa di conhuntamente cu un otro of otronan, ladronicia cu violencia riba 11 di September 2011 di un tas y/of mas pertenencianan di un persona. E violencia a encera cu a hisa camisa y a mustra e persona un arma di candela y a bisa e palabranan menazante: “No vayas a gritar sino te disparo y te mato”. B.V. y C. ta wordo acusa tambe di, conhuntamente cu un otro of otronan, ladronicia cu violencia di un tas y un yabi y mas pertenencianan di un persona riba 11 di September 2011.
E violencia a encera cu a bolbe hisa shirt y a mustra e persona un obheto na un manera menazante y a bisa (entre otro): “Me da la bolsa y no te mueves” y/of “Sigue caminando o quieres que te mato”.
Banda di esaki B.V. y C. ta wordo acusa di, conhuntamente cu un otro of otronan, ladronicia cu violencia di un tas y un suma di placa y mas propiedad di un persona riba 18 di September 2011 dor di, hisa camisa, mustra arma y/of a ranca su tas. B.V. ta wordo acusa di, conhuntamente cu un otro of otronan, ladronicia cu violencia di un tas y mas propiedad di un persona riba 6 di October 2011.
E violencia a encera cu el a gara e persona tene, a pone cuchio na su garganta y a bise: “Callate y no te grites sino te voy a clavar”.
E caso a wordo trata dia 16 di April y Fiscal a exigi un castigo incondicional di 4 aña contra ambos sospechoso.
Diabierna huez a bisa cu e ta haya tur e acusacionnan comproba.
El a bisa cu e tipo di crimennan aki ta hopi serio.
Specialmente mirando tambe cu nos isla ta biba di turismo.
Nos habitantenan y turistanan cu ta bishita nos isla mester por cana riba caminda sin mester preocupa di wordo atraca di dia cla of anochi.
E personanan cu a bira victima di e atraco quizas a keda traumatiza tambe, huez a bisa.
Huez a bisa si cu e ta tene cuenta cu e hecho cu e acusadonan no a uza violencia contra e personanan cu nan a atraca.
El a tene cuenta tambe cu edad di e sospechosonan. Huez a duna ambos persona un castigo incondicional di 2 aña y mey, kitando e tempo cu nan a sinta caba den detencion preventivo.
Nortero
(Quote)
Huez a bisa si cu e ta tene cuenta cu e hecho cu e acusadonan no a uza violencia contra e personanan cu nan a atraca.
(End of quote)
Kier meen cu si mi pone un cuchio na un hende su garganta i bise cu mi ta mate esei no te violencia?