Diario Online

Chofernan di Arubus no ta para den bushalte pero meymey di caminda pa baha pasahero!

Publication: Saturday, 12 May 2012. Categoria: General

Algun pasahero y chofernan di autobus ta remarca:
ORANJESTAD (AAN) – DIARIO a haya comentario di algun pasahero como tambe di un par di chofernan di autobus, cu tin keho tocante e manera con e chofernan di Arubus ta para den cualkier bushalte, cu no ta e terminal mes di Arubus.
Nan ta comenta cu nan ta baha e pasaheronan no den e bushalte mes, pero na mitad di caminda, locual ta hopi peligroso pa e usuario. Si cualkier motociclista, por ehemplo, ta dicidi di pasa cu velocidad meymey di e cant’i caminda cu e porta di Arubus ora un hende ta bahando, por dale y causa un lesion fuerte of hasta morto di e persona.
Esaki por mira ora nan ta para pabao di Toy’s na Wilhelminastraat, of den e bushalte pariba di e kerki. Envez di nan tuma un espacio unda e busnan chikito ta staciona, nan ta para net den e skina prome unda tin autonan ta lora pa drenta Wilhelminastraat.

Tanto algun pasahero como e chofernan concerni di autobus ta puntra si ta asina cu no tin ley pa Arubus, pasobra nan a yega di papia tocante esaki na DOPV, y nan a bisa cu nan tin e keho aki tambe di otro hendenan y cu nan ta bay controla, pero te dia di awe mescos ta tumando lugar.

Asina ta cu nan ta spera cu Gerencia mes di Arubus por papia cu su chofernan pa tene bon cuenta cu e bushaltenan tey pa nan tambe cumpli cu e ley manera tur otro chofer di transporte publico.