Comerciantenan di Caya Grandi awor si ta clamando cu lunanan di Maart y April tabata pesimo pa nan!
Debi na retraso proyecto Caya Grandi:
ORANJESTAD (AAN) — Den entrevista cu señora Audrey Croes- Lacle, presidente di MAMBO, el a duna di conoce cu e trabaonan cu ta tumando lugar back den Caya Grandi ta trece reaccion for di e comerciantenan, debi na cobamento di buraconan grandi y demasiado stof cu ta stroba nan pa funciona bon. E comerciantenan awor si ta clama pa e situacion y nan a uni pa laga nan voz resona cu e lunanan di Maart y April tabata pesimo pa nan. Awor nan a cuminza kita e hekwerk, pero entre Maart y e periodo di Siman Santo, e consumidornan local y turista no tabata ni drenta den Caya mes, ora nan a wak e situacion nan tabata bay back den direccion di Royal Plaza, por ehemplo.
Na e momentonan aki, sra. Croes- Lacle a indica, e comerciantenan ta clama y ta necesario pa e trabaonan bay mas lihe posible si kier pa un porcentahe grandi di Caya sobrevivi.
El a señala cu e comerciantenan cu tin nan propio edificio por corta gasto unda cu nan por, pero unanimamente nan ta sinti manera e dicho ta bisa, cu nan ta “na fin di nan latin” y esaki ta un hecho.
Nan ta purba di stimula e consumidor pa nan haci mescos cu ora nan bay cu nan yiu riba un veld di deporte, pa ora nan bin Caya bisti nan keds pa nan pasa door di e aventura di e situacion aki cu ta birando un amargura, pero pa pase hunto y purba yuda otro pa tene nos Caya na bida.
El a agrega cu e comerciantenan tin cu uni forza pa sobrevivi y competi cu otro pa wak ken ta duna e mehor servicio y e mehor mercancia, pero pa logra esaki nan mester ta uni y sra. Croes- Lacle a haci un yamada na tur e negociantenan den Caya pa para hunto yuda otro.
Diabierna cu ta bin MAMBO lo tin un reunion cu Infrateam, pasobra nan tin tempo cu nan no ta haci esaki mientras cu e idea tabata pa sinta tur Diabierna, pero tin hende cu tabata afo y pa diferente otro motibo nan a cancela e reunion aki como tres biaha.
MAMBO mester sa kico ta spera nan pa sa unda nan ta para, pasobra si Pasco ta bay topa nan den e mesun situacion di aworaki e ora ey no por busca solucion na corto plazo.
E retraso cu tin den e proyecto, segun sra. Audrey Croes- Lacle, segun e tin entendi, ta cu hopi proyecto ta andando na mesun momento, y e ta kere cu e mesun ehemplo di loke e comerciantenan tin cu haci di prepara un presupuesto y traha un plan pa maneha nan negoshi y nan cas, gobierno tin cu haci pasobra tur cos pareu no por.
MAMBO no a wordo poni na haltura e ultimo tres pa cuatro simannan, cu tabata tin masha tiki comunicacion, entre e Comision cu mester sinta cu e organizacion y nan mes pasobra cada biaha cu mester a bin hunto, cada bez cu sra. Daine Flemming cu ta encarga cu organiza e reunionnan e ta haya tende cu “esaki no por, cu esun no tey” pero awor mester sinta cu cartanan abierto pa wak cada comerciante con ta bay tira nan ultimo carta.
