Cu e vuelo inaugural di Westjet y Sunwing awor den mei 2012
Aruba lo tin 5 vuelo semanal for di Canada
ORANJESTAD(AAN)– Minister Otmar Oduber ta hopi orguyoso di por anuncia cu Aruba ta bay conta cu un total di 5 vuelo semanal for di Canada. Ya caba durante ATCA 2012, a haya e grato noticia cu Sunwing ta agregando un vuelo for di Montreal cuminsando winter 2012-2013, algo cu a wordo logra danki na esfuerzonan grandi di diferente sector den mercado turistico, manera ta Ministerio di Turismo, Transporte y Labor, ATA, AAA y AHATA. E avion cu ta bin Aruba ta un 737-800 cu capacidad pa 189 pasahero y e lo ta uno cu ta pa henter aña. Banda di esaki diadomingo a yega e vuelo inaugural di Westjet Airlines for di Toronto. Nan a cuminsa bula cu un Boeing 737-800 cu capacidad pa 136 pasahero y e vuelonan ta tuma lugar riba tur diadomingo.
John Macleod, Vicepresidente y Network Management and Alliances a duna di conoce cu Aruba ta un di e islanan mas fascinante den Caribe cu un temperatura ideal, un lugar perfecto pa bishita na cualkier momento di aña.
Greg Palmer, Public relation Manager di Westjet a bin den e vuelo inaugural y a duna di conoce cu e ta hopi entusiasma di por agrega Aruba na e destinacionnan cu nan tin pa ofrece.
Hunto cune a bin 10 agentenan di biahe invita pa ATA, acompaña pa Colleen Lessard, gerente di benta di ATA na Canada. ATA a prepara un programa pa nan haya sa kico tur Aruba tin pa ofrece como producto turistico.
Minister Oduber ta expresa for di Hulanda, caminda cu e ta actualmente pa establece lazonan cu e industria di turismo crucero Europeo, cu Canada ta un mercado di importancia pa nos isla y ta trata di un mercado cu ta mustra un crecemento significativo, manera ta 7.7% den 2011. Pronosticonan pa 2012 ta indica cu e resultadonan ta bay sigui positivo, mas ainda mirando e diferente opcionnan cu tin pa por yega Aruba.
