E no ta un noticia saca for di aire, ni cu a yega Aruba via cualke platiyo bulado, sino algo cu tur hende cu ta biba na Aruba ta consciente di dje: e isla tin un Gobierno superactivo, cu no ta laga obstaculonan, no ta importa con grandi o chikito, benta banda di caminda, sino cu e ta enfrenta nan pa busca e solucionnan mas adecuado. Den e caso di Valero esaki a bira asina visible cu ta solamente esnan cu ta usa bril di palo pa custumbra (no pa necesidad) no ta mire. E lucha pa mantene e refineria habri como e di dos pilar economico di Aruba ta uno grandi, pero cu a ser enfrenta y emprendi cu curashi door di un Gobierno cu tin e interesnan di e isla na pecho.
Banda di Valero bo ta haya tambe e esfuerzonan increible cu Ministro Otmar Oduber ta haciendo pa amplia e prome base economico di Aruba, o sea su turismo. No ta pasa un dia cu no tin algo nobo riba horizonte, y e Ministro, acompaña pa su ekipo di expertonan, ta explorando delaster avenida cu ta existi pa consolida y amplia e mercado cu ta supli Aruba di turista. Ta logico y bon conoci cu mayoria di nan ta bin di Merca, pero cu esun di Colombia y Venezuela tambe ta dunando señalnan positivo di aumento. Otro mercadonan nobo ta ser explora cu cuidado y cu e posibilidadnan real na bista. Perde tempo o placa o esfuerzo explorando mercadonan imposible o dificil di abarca no ta forma parti di e plannan di e Ministro mas activo cu Aruba a conoce den e ultimo decadanan.
Fuera di e dos pilarnan economico di e isla, loke ta mas notable ta tur e trabaonan cu ta tumando lugar den e centro di Oranjestad y su alrededornan, algun di e mas importantenan relaciona cu e futuro instalacion di un trein o tram o loke sea cu e ta bay ta den e sentido ey, cu lo haci un recorido di waf pa e caya principal di e ciudad, cubriendo diferente ruta den e trayecto ey. E visionarionan di Gobierno ta convenci cu e lo crea un avenida economico y turistico nobo pa e isla, y cu e lo duna Aruba un caracter o aspecto moderno y atractivo pa tanto e localnan como e bishitantenan. Tin diferente hende cu no ta convenci totalmente di e utilidad di tal proyecto, pero ta dificil na e halturanan aki huzga y duna un opinion certero riba dje. Mester carga pasenshi y duna e proyecto e oportunidad di conclusion y djey midi su utilidad pa e isla.
Hopi dI nos na Playa a cuestiona e sabiduria di emprende tanto tarea alavez, na lugar di tuma nan un pa un, o dos pa dos, pero concluyendo nan prome cu inicia e di tres o di cuatro tarea. Sinembargo, unda cu bo drey na Oranjestad bo ta topa cu cambionan di flecha y direccion, y trabaonan di cobamento di caya sin un aparente meta inmediato. E ta causando un estorbo grandi y cierto iritacion cerca esnan cu ta usa e vianan di acceso y circulacion den e Capital di Aruba.
Lo prudente ta pa carga un tiki mas di pasenshi y spera cu esnan cu ta haciendo e trabaonan compronde e molester grandi cu nan ta causando pa asina mira si nan por pura e conclusion na lugar di planifike riba un termino asina largo. Personalmente mi tin un confianza grandi den Ministro Zevinger y ta convenci cu e sa loke e ta haciendo y cu e trabaonan, pa fastioso cu nan por ta actualmente, lo redunda den un beneficio grandi pa e isla, y un contribucion mas na e desaroyo y futuro di e prome pilar economico di nos isla. Mi ta spera cu e lo ta asina y cu e pasenshi exigi di nos lo termina den algo positivo y cu bal e wardamento y pasenshi exigi di nos.
Aruba ta na vispera di un aña di eleccion, y pronto (mi ta supone) campaña lo inicia pa busca e votonan di e mayoria di Pueblo pa asina dune e Gobierno cu e mes lo elegi y lo merece. Na simple bista no ta parce cu tin mucho opcion riba horizonte, ya cu pa loke ta trata oposicion, e no ta parce di por a consolida su mes via e partido mas grandi di e sector politico ey. MEP ta sigui sin duna señalnan di e progreso spera cu e cambio di liderazgo, y no ta imposible kere cu lo por bin un virahe ainda den e direccion tuma y e partido lo por bolbe elegi kende a dirigie durante tanto decada despues di Betico. Pero, esaki ta puro speculacion y no ta basa riba ningun indicacion real existente.
Loke si ta bisto ta cu e di dos partido mas grandi di Aruba no ta reaccionando manera a ser spera, y cu esaki ta habri caminda pa e surgimento di mas partido chikito y e consolidacion di esun lidera pa Andin. Ningun di nos ta doño di un bola magico, ni por asumi e capacidad gitanesco di por mira futuro via un bala di cristal y pronostica e resultadonan di e proximo eleccion.
Pero, manera cosnan ta mustra actualmente, ta hopi dificil descarta e creencia cu AVP lo bolbe sali triunfante. Hopi ta depende di e desaroyonan cu ta tumando lugar riba diferente tereno economico, cu lo por resulta facilmente den un consolidacion di e opinion ey. Sinembargo, ta tempo so lo por confirma loke e realidad actual ta bisami sin e posibilidad di ekibocacion.
