E siman aki lo cuminsa drecha e di e tres fase di La Sallestraat
ORANJESTAD (AAN): Departamento di Obra Publico ta informa cu a keda cla cu drechamento di e segundo fase di La Sallestraat cu ta core te na e crusada cu Kamerlingh Onnestraat. Awor lo continua cu e parti cual ta e pida caminda cu ta core for di e crusada di Kamerling Onnesstraat te na Smit & Dorlas. Den e prome dos simannan lo drecha y asfalta e parti di e crusada di Van Leeuwenhoekstraat/La Sallestraat. Asina cu keda cla cu e crusada lo habri esaki pa tur trafico. Durante e periodo cu ta trahando riba e crusada di van Leeuwenhoekstraat lo por yega e Imelda kleuterschool via e rotonde of via e caminda patras di e school.
Lo continua despues riba e pida caminda cu ta keda entre e crusada cu van Leeuwenhoekstraat y Smit & Dorlas. No solamente lo pone un capa di asfalt nobo pero lo construi un drenahe di awa tambe bou di e caminda. Durante e periodo aki por yega Imelda kleuterschool solamente via e caminda patras di e school.
Despues cu keda cla cu e di tercer fase lo renoba e capa di asfalt for di Smit & Dorlas bay pa e rotonde.
E trabaonan lo cuminsa diaranson dia 9 di mei 2012 y lo tin un duracion di 35 dia di trabao.
Durante e prome periodo di construccion e caminda di La Sallestraat menciona lo bay ta parcialmente cera. Lo cera e pida caminda pa tur trafico y lo indica e ceramento cu borchi y heki di trafico.
Departamento di Obra Publico ta haci un peticion na tur manehador di auto pa no haci uzo di e camindanan aki si no ta pa bo yega school, bo cas of negoshi. DOW ta pidi comprension y disculpa pa cualkier inconveniencia cu e trabaonan menciona por ocasiona.
