Entrenador Jeff Nedd a gradua den e International Coaching Enrichment Certification Program
ORANJESTAD (AAN): E conocido entrenador Arubano di boxeo, esta Jeffrey Nedd a logra su diploma internacional den coaching. Despues cu algun luna atras su persona a inicia cu e curso internacional di coaching, por cierto uno hopi intensivo, caminda e mester a biba algun luna den exterior, porfin e dia tan spera a yega unda cu el a haya su diploma certifica di Comite Olimpico Internacional. E programa internacional di coaching, e asina yama “International Coaching Enrichment Certification Program” a yama un caluroso bon bini na e 28 miembronan di e grupo di 2012 na e ciudad di Lausanne, Suiza. E di cuater edicion di e programa ICECP tabata un esfuerzo colaborativo entre e Comite Olimpico Mericano, e Universidad di Delaware y Comite Olimpico Internacional cu a inclui coachnan for di cinco diferente continente, binti ocho pais y diez deporte.
E clase mundial di e programa educativo di coaching ta ser ofreci door di NOC y ta consisti di lecturanan, presentacionnan di e participantenan, traha den grupo y sondea den area di trabao, esakinan reparti den cuatro modulo, cu ta inclui un aprendizahe cu e coach nacional of e team colegial mericano.
E klas di 2012 tabata inclui coachnan di American Samoa, Antigua and Barbuda, Aruba, Austria, Bangladesh, Barbados, Belize, Bosnia and Herzegovina, China, Chinese Taipei, Cook Islands, Egypt, Ethiopia, Fiji, Georgia, Guam, Japan, Macedonia, Malawi, Malaysia, Micronesia, Namibia, Pakistan, Romania, Saudi Arabia, South Africa, St. Vincent and the Grenadines, y Tanzania.
