Esnan di Elmar tin intencion di protesta Diaranzon mainta
Trahadornan a haya calculacion riba nan placa diamars anochi
ORANJESTAD(AAN): E trahadornan di NV Elmar parce tin intencion di pone trabao plat diaranzon mainta atrobe. Manera ta conoci tanto door di Abogado mr Edwin Duijneveld como tambe director di Elmar, a keda di reuni y papia riba e resultado di e calculacionnan diahuebs.
Tabata pendiente tambe pa mas tarda diamars e trahadornan di staf haya nan calculacionnan cla pa asina pasa den dje diaranzon y diahuebs bin mesa cu gerencia di Elmar. Elmar su gerencia no a keda cla diamars atardi pero esaki a tuma tempo y el a keda cla diamars anochi.
E trahadornan di Staff no a gusta cu diamars atardi ainda nan no a haya e calculacion di e placa cu nan mester haya for di Elmar. Esey a pone cu nan a rabia. Parce cu nan tabata tin un reunion diamars 5or pa repasa e calculacion. Gerencia mes no tabata sa di e reunion entre e abogado mr. Edwin Duijneveld y Staf 5or diamars pa entre nan mes atende e calculacion prome cu diahuebs. A base di esey diamars anochi algo pasa di 7or e abogado a manda un carta den nomber di staf notificando gerencia cu nan lo tin reunion na Playa y no sa ainda si nan lo drenta trabao back.
Mientrastanto pa 9or di anochi gerencia a manda e calculacion pa e abogado pasobra e momento ey a termina e trabaonan. No a palabra ora pa manda e calculacion diamars y sigur pa 5or di atardi ora staf kier a reuni e calculacion no tabata cla. Mientrastanto tin un of dos hende cu ta instigando e demas miembronan di staf. Tin informacion awor tambe cu e calculacion y entrada cu staf lo haya tin un parti cu belasting ta bay cune. Esaki tin algun di e miembronan di Staf tambe poco rabia.
Den esey dimes NV Elmar no por yuda nan pasobra ta traha a base di ley. Si e suma grandi ta exigi un parti significante cu mester bay na belasting ta algo cu gerencia di Elmar mes no por haci nada na dje. Parce cu gerencia tabata tin contacto cu abogado cu a mustra cu staf lo reuni mainta diaranzon y despues lo dicidi kico ta pasa.
Di otro banda e grupo di miembronan di UEA tambe kier reuni pasobra ta exigi un reunion cu gerencia. A mustra e presidente cu tin basta trabao pa atende y diahuebs tambe tin reunion cu Staf. Sindicato UEA tambe lo tin reunion y a base di e resultado di e reunion lo dicidi si lo bay traha of no te ora cu nan haya reunion. E miembronan di Staf tambe kier a haci mescos te ora nan haya calculacion. Awor e calculacion ta den nan man. Si UEA sigui cu su plan di reunion y despues bay den protesta y mescos e staf anto Elmar na San Nicolas lo ta sera.
Esun na Hato ainda kizas lo keda standby of sera pa asina Elmar por habri solamente na Playa pa brinda servicio na e pueblo. Den pueblo ta sinti cu a cuminsa fada di e tipo di comportacionnan aki cerca e trahadornan. Nan a sera un bon CAO aña pasa y awor ta otro problema. Mientrastanto coriente ta bay casi tur dia den cierto areanan di Aruba y pueblo parce mester acepta y keda keto. Na dado momento e pueblo tambe kier cuminsa exigi si ta mas placa mester duna na trahador anto nan tambe mester keda haya un bon servicio como pagador di coriente. Spera cu despues di e diferencia di opinion cu tin awor aki no tende di otro problema atrobe.
