Evelyn Wever-Croes ta reta Mike Eman:
Bin cu prueba den 3 dia!
ORANJESTAD (AAN): Lider di e partido geel, Evelyn Wever-Croes durante nan conferencia di prensa semanal tambe a reacciona riba e expresionnan y acusacionnan cu Mike Eman a lansa den su direccion.
Mike Eman a cuestiona si Evelyn Wever-Croes ta honesto den su preocupacion cu caya grandi. Mike Eman ta duda esey pasobra den e gobernacion anterior Evelyn Wever-Croes, cu por cierto no tabata den e gobernacion ey mes, no a preocupa pa centro di ciudad.
Eynan Mike Eman a lansa un cantidad di acusacion den direccion di ex ministernan Nel Oduber, Booshi Wever y Marisol Lopez-Tromp cu segun Mike Eman lo a mata centro di ciudad y barionan.
Mike Eman a sigui cu bisa cu e gobernacion anterior cu tabata di tata di Evelyn Wever-Croes, otro mentira, a gasta 6 miyon na oficina di abogado, tambe un mentira, 16 miyon na huur pa tanta di Evelyn Wever-Croes, otro mentira, y talves e eror mas grave di Mike Eman, ta ora el a añadi cu a toca Evelyn Wever-Croes un parti substancial di e suma ey.
Tambe Eman a declara cu ruman di Evelyn Wever-Croes a haya un contract di huur di gobierno prome cu e prome piedra a worde poni, otro mentira flagrante.
“Mi ta rechaza enfaticamente tur locual cu nos Prome Minister a declara den loke a parse un racha di locura, nan no ta cuadra cu berdad, y mi ta reta nos Prome Minister pa bin cu prueba cu mi a horta placa di gobierno, dentro di tres dia. Si e no por bin cu prueba di locual e ta declara, anto mi ta conclui cu e ta un gañado, y e mester sera su boca”.
“Personalmente mi ta haya duele di dje, pasobra el’a demostra cu tin hopi presion riba dje y cu e crisis den nos pais y den gobernacion a cuminsa bira di mas pe.
Den e momentonan dificil aki, nos pueblo mester di un Prome Minister cu cabes frieu pa tuma e decisionnan corecto, pa soluciona e drama den caya grandi, pa soluciona nos situacion financiero, pa soluciona nos problemanan social, pa baha nos costo di bida, pa baha prijs di awa y coriente di berdad.
Nos pueblo no merece un Minister Presidente cu no por cu e presion di su propio mentiranan, di e problemanan cu su propio promesanan falso di campaña a hinke aden.
Mi ta conseha Mike Eman bin cu prueba di locual e ta bisa, sino e tambe lo haya un veredicto devastador di hues, cu ya caba a declara legalmente prueba cu Clariska Velasquez y Melvin Tromp ta un gañado, sigui pa Mike de Meza cu e mes a declara na hues cu e ta un gañado, y awor nos Prome Minister di pais Aruba ta bay worde declara gañado.
E momento a yega cu politiconan di AVP, y sigur nos Prome Minister, mester cuminsa actua manera adulto y stop di gaña riba otro hende!”, segun lider di MEP, Evelyn Wever-Croes.
