For di 26 aña pasa Dr. Falconi a keda impresiona cu e nivel halto di enfermeria di Hospital di Aruba
Cu por compara cu cualkier hospital universitario na Hulanda
ORANJESTAD (AAN): Dialuna a tuma lugar un ceremonia na Hospital pa apertura oficial di e siman di enfermeria 2012, cu e tema “Closing the Gap”. Prome cu a hisa bandera di siman di enfermeria hunto cu bandera di Aruba, Director di Hospital Dr. Jaime Falconi a hiba palabra. El a cuminza na felicita enfermera Gina Maduro cu su cumpleaños y cu e tremendo trabao cu semper el a haci den efermeria, cuminzando ta traha como ‘ziekenverzorgster’ pa traha duro y yega unda e ta awor trahando den ‘Spoedeisende Hulp’. Despues Dr. Falconi a felicita tur enfermero tambe cu e siman di enfermeria. El a splica cu 27 aña pasa el a termina su estudio na Groningen Hulanda despues di cual e no a bin back di biaha.
Dr. Falconi a sigui bisa cu el a keda 1 aña mas Hulanda, pasobra e no tabata sa kico tabata spere na Aruba.
El a bisa cu despues el a cumpra un pasashi y el a bin Aruba y aki el a worde confronta cu kico Hospital tabata tin di ofrece.
Entre otro el a tene combersacion cu hefe di enfermeria e tempo ey Ronny De Kort, pero el a papia tambe cu personanan encarga cu Enseñanza cu ta Richard Maxwell, Glenda Margareta y Zuster de Lange.
Nan a sinta repasa e funcion di enfermeria pero tambe e opleiding di enfermeria na Aruba. Ora cu el a caba di analiza esey el a haya yen formulario riba con e curriculum tabata y el a bay back Groningen.
El a splica cu Groningen y e mes a keda sumamente sorprendi cu e nivel halto cu enfermeria tabata tin e tempo ey na Aruba.
“No tabata tin mihor y bo por a compare hasta cu cualkier hospital universitario na Hulanda”.
Esaki segun Dr. Falconi, kende a sigui bisa cu asina bon e personanan aki tabata funciona na Aruba.
“Mi ta wak awe tambe un grupo grandi di enfermero di e tempo ey y mi kier a gradici boso for di profundo di mi curazon pasobra boso a haci mi trabao como specialista e tempo ey mucho mas facil di loke mi por a spera”, segun Falconi.
