GKMB ta fumigando na Spaans Lagoen y Mangel Halto
ORANJESTAD (AAN) – Matutino DIARIO a entrevista señor Roque Dirksz, director di Gele Korts Muskiet Bestrijding (GKMB), tocante e situacion di sangura na Mangel Halto y ki medidanan ta bay tuma.
Señor Dirksz a duna di conoce cu nan GKMB a bay wak e lugar y for di Diaranzon cu a pasa nan a cuminza cu accion intensivo. Aworaki nan ta poniendo un tipo di insecticida biologico cu yama BTI, cu ta mata e larvanan y e webonan cu ta worde poni tambe ta worde neutraliza. Nan a cuminza pone saconan di 50 liber, y nan ta concentrando riba Spaans Lagoen, y nan ta bezig matando e adultonan cu ta bula pasobra aworaki tin hopi molester mes, y tin dos trahador cu ta bezig ta fumiga e mangelnan, y nan lo ta haciendo e trabao aki dialuna y diamars di e siman aki, ainda.
Dirksz a splica cu e sanguranan cu tin eynan ta worde yama “Tenerifis” y den boca di pueblo tin hende ta yama nan helicopter pasobra nan ta hopi grandi, pero nan no ta haya daño na salud di hende. Pero pa cacho cu si por ta peligroso pa cacho cu ta cana eybanda of ta drenta den mangel, pasobra por duna nan ataca di curazon.
Señor Dirksz a reitera cu e larvicide cu nan ta poniendo ta un sistema biologico similar na un korrel bruha, cu ta worde hinca den e awa, y esaki ta pa cuminza baha e cantidad di larvanan y neutraliza e webonan. El a bisa cu e producto aki e publico tambe por cumpra y tire den e pos y tin un duracion largo y si e sangura adulto pone webo mes nan no ta yega na bira adulto y e ta aproba pa e instancia internacional cu ta regula y controla e insecticidanan y productonan apto pa uza y GKMB ta cumpli cu e regulacionnan y ta usando esaki den e Mangelnan.
