Gobierno no por maneha situacion di caya grandi y ta creando un situacion social economico explosivo
Parlamentario Arondino Croes:
ORANJESTAD (AAN): Segun Parlamentario Arondino Croes si nos analisa e situacion den caya grandi nos por constata cu gobierno no por maneha e situacion.
Prome Ministro a scucha e comerciantenan pero tur cos ta keda na scucha, e manera di actua aki ya nos por a mire den dialogo social, ta scucha y no ta actua, solamente ora mester di gremionan pa medida ta pidi sosten.
Segun parlamentario Arondino Croes nos por constata cu tecnicamente e gobierno ta for di control di e situacion, awor no solamente ta paraliza caya grandi pero tambe cayanan di aceso pa caya grandi. Tambe trabaonan cu mester tabata cla caba awor ta resulta d no bon haci. Tubonan nobo no ta conecta tubonan bieu.
Parlamentario Arondino Croes ta kere cu esaki lo trece mas tardanza pero tambe lo exigi mas placa. Manera conoci no tin mas placa, e situacion financiero di gobierno ta asina precario. Gobierno di MEP a laga un bon proyecto atras manteniendo caya grandi su estado original pero adapta na un infrastructura agradable pa e bishitante. Envez di e locura di tram por a escoge pa sistemanan mas facil manera autonan mas chiquito.
E trabaonan ta parse di no tin fin, y e pregunta ta unda e limite di tolerancia ta, un pa un e comerciantenan ta bin cerando negoshi y asina ta causa un desastre pa doñonan di empresa y nan trahadornan. Parlamentario Arondino Croes ta di opinion cu esaki sigur ta un situacion social economico explosivo cu mester atencion di inmediato y berdadero y no un gañamento constante.
