Habitantenan ta reclama: Caminda na Camay a keda cu mesun molester di awa sushi y mal holo!
ORANJESTAD (AAN) – Na varios ocasion DIARIO a publica situacion di e caminda na Camay, cu ta keda na e parti pazuid di e apartamentonan cu tin ey banda, despues cu habitantenan ta trece nan reclamonan vario biaha. Un di habitantenan a splica DIARIO : “Ta asina cu tabata tin un proyecto andando pa loke ta drechamento di e caminda aki, pa asina alivia e tension y molester di su habitantenan y tambe tur cu ta pasa ey, den auto of na pia. Un di e molesternan grandi ta e mal holo ora awa yobe bruha hunto cu e awa sushi di riool ta subi e caminda plama bay y di e manera aki molester ta cuminza y hasta cu excremento humano. Esaki ta inhumano y anti-higienico, y ta con nos lo cuida nos salud, cu tanto porkeria ta rondona chikito y grandi ?? Nos como habitantenan no por soporta mas e situacion di tanto mal holo y awa sushi y tur clase di insectonan cu esaki ta trece cune pa nos aki na Camay. Tanto placa cu a gasta cu proyecto aki pa awe te ainda habitantenan no a mira solucion ni fin na e molester aki, pa su habitantenan por biba higienicamente. Nos tin como diez aña ta wanta e mal holo, awa sushi y sin mira e solucion.
Diasabra ultimo, cu e tiki awa cu a cay nos como habitantenan a pasa den mal momento atrobe, den henter besindario. Imagina cu temporada di horcan ta na caminda, of nos lo sigui pasa den esaki ?
Nos ta spera di mira solucion pronto, prome cu e temporada di horcan cu ya pronto lo ta na porta y sigur lo trece su awaceronan cune y tur molester”, segun habitantenan di Camay cu a yama redaccion di DIARIO cu nan reclamonan pa di tantisimo biaha.
