Diario Online

Huez Comisario nobo no ta prolonga detencion di chofer Hulandes kende a dal peaton mata cu auto na Belgiestraat

Publication: Thursday, 24 May 2012. Categoria: General

ORANJESTAD    (AAN): Informacion cu DIARIO ta dispone di dje ta indica cu Huez Comisario nobo Haeck, no ta bay prolonga detencion di e mucha muher Hulandes (Nuboer), kende tabata bao di influencia di alcohol ora cu el a dal un peaton mata cu auto den Belgiestraat.

E mucha muher despues di a hit and run, despues a entrega su mes na autoridadnan y nan a constata cu e tabata bao di influencia.

Motibo pa cual e Huez Comisario no ta prolonga detencion di e sospechoso, ta cu e no ta un caso cu ta shock e orden di husticia den nos comunidad.

Pues aparentemente e hecho cu un mucha muher cu tabata bao di influencia di alcohol y a dal un persona mata, aparentemente sin ‘brake’ y despues a core bay for di e sitio, no ta algo cu ta shock e estado di husticia den comunidad.

Ministerio  Publico hunto cu Cuerpo Policial for di algun aña caba ta trahando duro pa baha e cantidad di accidente y specialmente esnan cu tin di haber cu consumo y abuso di alcohol, cu ta kita bida di hende.

Pues awor seguramente O.M y KPA lo ta basta disgusta cu e desaroyo aki.

Informacion ta mustra cu e average di e cantidad di accidente fatal di trafico na Aruba ta hopi mas halto cu cualkier parti di West Europa.

Un cantidad di por ehempel 20 morto door di accidente di trafico pa un poblacion di 100.000 habitante ta un promedio hopi halto.

Pesey O.M a cuminza cu un maneho pa bay contra esaki, pero awor lagando e persona aki bay, pendiente di tratamento di su caso, ta algo cu sigur lo trece un discusion den comunidad y quizas rabia of desapunto di parti di famia di e señora cu a fayece.

Mayoria biaha ora cu Huez Comisario dicidi di laga un persona bay pendiente di tratamento di su caso, e Huez cu ta atende cu e caso no ta sentencia e persona mas pa un castigo unda cu e tin cu bay back KIA.

Pesey ta interesante pa wak kico ta bay pasa cu un persona cu bao di influencia a kita bida di un person kende despues di su trabao tabata cruza caminda pa bay su cas cerca su famia.

Loke ta traha na fabor di e acusado ta cu el a entrega su mes na polis, pero esey no ta kita afo cu el a comete un acto criminal, door cu e tabata bao di influencia di alcohol.

Durante tratamento di su caso mas detaye lo bin dilanti y quizas eynan lo sali na cla mas ainda e motibonan exacto cu e persona a worde laga den libertad caba.