Linear Park lo bira otro proyecto cu lo fracasa na man di Gabinete Eman
Parlamentario mr. Xiomara Ruiz-Maduro (Fraccion MEP):
ORANJESTAD (AAN): Durante conferencia di prensa di partido MEP parlamentario di fraccion di MEP, Xiomara Ruiz Maduro, na november 2010 Gobierno di Aruba a otorga e proyecto di construccion di e promer fase di e Linear Park na un contratista extranhero pa mitar di e prijs cu a ser stipula pa DOW.
Hopi ta esnan cu for di e momento ey tabata tin nan dudanan si e proyecto aki lo por worde ehecuta na un manera drechi y di e calidad cu nos ta custumbra cune aki na Aruba.
Awe mas cu 1 aña despues cu e proyecto a worde otorga, nos por constata cu tin un retraso grandi den e proyecto, materialnan inferior ta worde usa, e trabao ta worde haci con cu ta, trahadornan no ta worde paga mane mester ta y tur cos ta mustra cu e Linear Park por lo pronto no por worde finalisa y lo fracasa na man di Gabinete Eman.
E otorgamento di e proyecto di Linear Park aki riba su mes ta cuestionabel, como cu Gabinte Eman a otorga e proyecto aki pa mitar di e prijs cu DOW a calcula cu e trabaonan lo costa, na un compania di construccion totalmente desconoci na Aruba.
Segun DOW e trabaonan di embeyesimento di e promer fase di Linear Park, cu ta e area di Plaza las Americas pa Parke Wilhelmina, lo tin un costo di 9 miyon Florin. Pa e prijs aki lo construi un caminda pa core bicicleta, un caminda pa cana, iluminacion cu luznan LED, decknan cu afdak, parkeo, bañonan, kiosco y espacio suficiente pa organiza actividadnan.
Tres compania di construccion a purba nan suerte pa haya e proyecto aki, pero Gabinete Eman a dicidi di otorga e proyecto aki na e compania Prosuinca NV cu a indica di por haci e trabaonan pa 4,8 miyon Florin den un periodo di 6 luna, entregando e proyecto na september 2011.
Segun e Ministernan Oduber y Sevinger y tambe e Director di DOW a splica, e diferencia den e prijs di calculacion di DOW y locual Prosuinca NV ta pidi, ta sinta den e hecho cu e trabao mas grandi, pone klinkers, lo worde haci cu un machine special. Di e manera aki no lo tin mucho gasto di labor y por tene e prijs abou.
Awor despues di mas di 1 aña cu e proyecto a worde otorga, nos ta worde confronta cu e consecuencia di Gabinete Eman su escohencia. E proyecto tin un retraso enorme. E machine special pa pone klinkers no ta worde usa.
E trabao cu a worde haci y e materialnan cu ta worde usa ta di calidad inferior y diferente sub-contratista a bandona e proyecto debi cu nan no ta worde paga debidamente y no kier ta participe den e fomentacion di cheap labor cu ta pasa bou di nanishi di nos Minister di Labor, sin cu esaki ta tuma medida pa pone un paro na e abuso aki.
Mester remarca cu ta masha cuestionabel con nos Minister Sevinger y e expertonan di DOW ta permiti un construccion asina inferior di e infrastructura di e Linear Park tuma lugar sin mas.
Ta masha condenabel tambe pa mira con keto nos Minister di Labor ta keda siendo cu tin asina tanto problema cu pago di e trahadornan di e proyecto. E pregunta cu ta surgi ta, pakico e contratista Prosuinca NV ta ser permiti pa haci tur e cosnan aki na nos Pais?
Ta di ki previlegio e compania aki ta goza cu consentimento di nos mandatarionan? Unda nos Minister di Finanzas a keda pa controla cu fondonan publico ta worde usa na un manera responsabel? Y mas cu claro, di con Minister Eman ta permiti su ministernan haci deshaci di e modo aki? Asina aki nos no ta logra bira e Pais 5 streya cu nos Minister Eman ta papia di dje.
Un cos ta sigur, tur e falta di resposabilidad aki di parti nos mandatarionan y nos expertonan na DOW ta pone cu awe despues di mas cu un 1 aña cu e proyecto aki a worde otroga, ainda e prome fase di e Linear Park no por worde finalisa. Sin duda e proyecto aki lo pasa pa bira un otro proyecto cu ta fracasa na man di Gabinete Eman, Ruiz Maduro a declara.
