Diario Online

Loke autoridad ta descubriendo den Restaurantnan ta motibo pa keda alerta

Publication: Wednesday, 9 May 2012. Categoria: General

Bo cuminda ta unsafe…
ORANJESTAD (AAN): Imaginabo cu un trahador di restaurant, ta bezig ta haci pidanan di galiña limpi, den un tobo grandi di awa… mientras cu su mesun pianan ta poni den e tobo? Esey ta loke cu autoridad local a bin descubri den luna di April na un restaurant local, ora cu a pasa haci un control di sorpresa den Cushina. Esey no ta tur! Nan a bin descubri hopi baki di galiña fresco, recien mata y pela pafo mes, cu boshi musca ta para riba nan, y ningun plastico of tapadera ta proteha nan!
Esey ta e motibo cu na final di April, diferente Restaurant a keda cera pa algun dia den area di Noord. Tambe a bin descubri algun Restaurant cu ta laga baki grandi yen di frozen Steak, ta ‘descongela’ pafo, siendo cu no tin ningun tapadera, ni cellophane pa proteha e carni. Y pesey tambe a bin descubri cantidad di musca riba nan para ta pone nan webo riba e cuminda.

DIARIO a compronde, cu e control aki ta pa bienestar di comunidad mes! Pasobra hopi biaha pueblo ta come algo, ta bira malo y no sa di con.

E control aki ta algo sumamente necesario pa socede cada rato! Imaginabo cu na un restaurant local, a bin descubri cu e kokinan den cushina ta usando tur bleki y botter di ingrediente cu a “expire” caba! Polis a confisca tur esaki, y a duna nan un multa.
Abo na cas ta percura pa bo benta tur producto ‘expired’ afo.

Pero den un cushina di restaurant? Ningun hende no tey pa mira esaki. Varios restaurant a worde multa pa motibo di incumplimento! Hasta e afzuigkap di un conocido restaurant a worde haya tur sushi, y net ora cu e Inspectornan tabata eynan, un “blob” di grease a djis cay for di e zuigkap aki y a cay directamente den un Wok cu tabata cushinando e momento ey riba stoof. Full e cushina tabata den bon condicion, cu excepcion di e afzuigkap. E doño a dicidi pa cuminza haci esaki limpi mesora.

Un restaurant grandi na Noord tambe a keda cera, ora cu autoridad a bay check e baño unda e koki y trahadornan mes ta usa como toilet. E cos ey no tabata cos di mira! Ni e color di e vloer no tabata mira mas.

E restaurant aki a worde cera pa mas hopi dia compara cu tur, pasobra e personal mester a bay haci extra esfuerzo, cu power washer, industrial strength cleaner, pa haci e lugar limpi bek.

Control a worde teni tambe riba restaurantnan cerca di Hotelnan. Na uno di nan a bin descubri cu e baki di sushi grandi, tabata poni apenas 30 centimeter leu for di e porta principal unda waiternan ta sali cu cuminda pa sirbi na mesanan. Tambe na un Convenience Store conoci, a bin haya un di e doñonan ta cortando galiña abao riba e piso pafo, pa despues e pone den saco di plastico, pone prijs, y bay pone den freezer paden. Ni a usa sikiera un mesa pa haci esey.

Recien tambe Autoridad a bin descubri dos restaurant den cual por a mira sushi di Djaca abao riba vloer den cushina. E dos restaurantnan aki a worde ordena pa cera, pa asina haci limpieza.

Pueblo mester ta mas exigente! Cuminza pidi mas calidad di restaurantnan! Aunke tin di remarca cu varios restaurant a haya un “bon rapport” di e controlnan aki, specialmente esnan cu ta nobo, of esnan cu tin bentana grandi pa publico mira e cushina abiertamente, tog abo como consumidor mester ta keda alerta pa check bon ora bo bay come, pa wak kico tin benta den bo cuminda.