Lotto mester cumpli cu nan contract di mantene e mashinnan di casino na aeropuerto
Peter Steinmetz:
ORANJESTAD(AAN): Na e momentonan aki tin tres localidad di casino riba tereno di aeropuerto. DIARIO a entrevista director di aeropuerto Sr. Peter Steinmetz, kende a duna su comentario referente esaki. Segun Sr. Steinmetz, e mashinnan aki ta worde opera door di Lotto pa Deporte, pero no ta tur dia tin hende ta bin inspecciona e mashinnan.
Gerencia di aeropuerto lo mester haya e casinonan aki for di Lotto, pero debi cu nan ta mara na un landsbesluit cu Lotto ta esun responsabel pa e explotacion, esaki no ta bay facil.
Ta wardando riba un cambio den e landsbesluit pa asina e parti operacional di casino pasa den man di AAA. Manera tur localidad, cierto porcentahe di ganashi ta bay pa aeropuerto. E director ta sigui bisa cu tin e localidadnan ta bon gusta pa cierto grupo di pasahero, pero si ta un estorbo pa otro. E localidadnan aki ta den espacionan separa, y muchanan no ta permiti pa drenta den nan. Cu esey aeropuerto no tin problema.
No ta tur cos ta operacional, mirando cu tin varios di e mashinnan no ta den bon condicion. Ta riparabel cu Lotto no ta bezig ta invertiendo den e mashinnan cu ta defecto. Pero si e espacionan aki ta operacional. Sr. Steinmetz a splica cu e no kier pa e mashinnan no ta den espacionan publico pa asina evita estorbo cerca otro biaheronan. Supuestamente tur dia mester tin hende constant ta atende e mashinnan, pero di un of otro manera, no ta logra a asina e empleadonan no ta mantene e mashinnan tur dia.
Ta mustra cu Lotto no tin interes mas pa mantene e mashinnan mirando cu lo bay bin un cambio den e landsbesluit. For di bista di aeropuerto, Sr. Steinmetz a sigui menciona, Lotto mester cumpli cu e contract, y mester mantene e mashinnan aki, pero esaki no ta worde haci.
Cu ayudo di e cambio den landsbesluit cierto cambionan por worde haci na e parti di mantencion di e mashinnan. Awo cu tin cambionan ta sosodiendo den aeropuerto pa otro aña, segun Sr. Steinmetz, ta pensando di pone un gameroom pa e muchanan, pero pa awor aki, e espacionan aki ta off limits pa muchanan y lo keda mantene asina.
