Minister Hooyboer-Winklaar a elogia e beyesa interno y externo di nos damanan luchador na e ‘Viva la Donna Day”
Durante un dia special pa tur e damanan fuerte y balente di Aruba
ORANJESTAD (AAN): E siman aki, Minister di Asuntonan Economico, Asuntonan Social y Cultura, Michelle Hooyboer-Winklaar tabata invitado special na un gran evento di nos damanan sobreviviente di cancer di pecho na Aruba. Den un ambiente masha special y intimo a celebra un dia special pa henter pueblo di Aruba, pero specialmente pa nos damanan balente y fuerte cu ta hibando nan lucha contra cancer, ya cu a celebra en grande e “Viva La Donna Day”.
Esaki ta un dia cu ta celebra mundialmente, unda cu e tur e pashentnan di cancer ta ricibi un tratamento di beyesa completamente gratis.
Pues e dia di “Viva La Donna Day” ta un forma di mima y consenti nos damanan cu ta hibando e lucha contra cancer di pecho. No ta un mentira cu na Aruba actualmente tin hopi caso di cancer, specialmente cancer di pecho, cu ta saliendo dilanti diariamente. E ta un lucha unda cu e damanan ta haya nan confronta cu ne y mester tuma tur tratamento y percusion necesario pa hiba e lucha aki. Minister Michelle Hooyboer-Winklaar a ricibi oficialmente su pin di strik roos di Mary Joan Foundation for di e Presidente, Señora Monique Palm , como muestra di su sosten contra e lucha di cancer di pecho na Aruba.
Minister a conta tocante su prome experiencia di ‘Viva La Donna Day’, unda e tabata presente pero tabatin un grupo hopi mas chikito. Na momento cu el a haya invitacion, e no por a bisa no, ya cu ora a splic’e kico tur ta e intencion di e dia aki, el a hay’e algo unico y sigur pa sostene, a pesar cu e tabata den un posicion diferente. “Esaki ta un necesidad! E no ta algo cu ta encera tratamento medico,pero si e ta un parti hopi esencial pa nos damanan ricibi tratamento fisico y mental tambe. Un chens pa nan sinti nan mes bon, fuerte y cu nan ta forma parti di un grupo cu tambe a pasa of ta pasando den e situacion aki. Un momento pa nan realisa cu nan no ta nan so y cu nan por forma un netwerk grandi, cu lo yuda nan den e momentonan dificil y doloroso,” e mandatario a expresa.
Minister a comparti cu e publico presente, cu netamente nan a desvela e bus, cu ta parti di un programa di CEDEHM. Nan a inicia e proyecto cu e frase: Women of Aruba are … y a base di loke e hendenan a yena, nan a uza e conceptonan pa expresa kico tur ta pensa di nos hende muhenan. Mary Joan Foundation tambe ta forma parti di e proyecto y e mandatario a keda hopi contento cu nan sosten cu e fundacion CEDEHM. “Riba e bus tin e palabranan cu ta describi nos hende muhenan y di e forma aki tur hende por visualisa loke ta pensa di nos hende muhenan ta awendia. Nan ta hende fuerte, sobreviviente, determina y luchado, netamente loke e damanan aki den tambe ta,” tabata e palabranan di elogio di e mandatario.
Na final di discurso, minister a elogia tur dama presente, ya cu nan beyesa tabata uno realmente di admira, specialmente e beyesa interior cu cada un tin.
