Pa otro aña e resumen di entrada di pension pa belasting lo bay via post atrobe
Director di SVb ta pidi pensionadonan dispensa:
Den futuro e pensionado mes lo por print via internet!
ORANJESTAD (AAN) – Matutino DIARIO a entrevista ing. Edwin Jacobs, director di Sociale Verzekeingsbank (SVb), tocante e situacion cu a presenta siman pasa durante e entrega di formulario di resumen di entrada na e pensionadonan, cual nan tin cu entrega na Servicio di Impuesto. Manera ta conoci e departamento a bira hopi congestiona y hendenan tabata keha y algun hasta a rabia. Director di SVb a señala, den un entrevista amplio, cu e ta compronde e situacion, y loke a sosode e no ta bay pasa mas.
El a anuncia e cambio cu ta bay bin unda cu el a cuminza pa splica con e sistema a bay prome.
“ Na momento cu el a asumi e cargo di director, na 2008 nos a constata ora e aanslag di belasting a sali, e personanan mester a pasa na SVb bin busca nan resumen di entrada di e aña prome, pa asina nan por yena nan papel di belasting. E pensionadonan cu ta haci uso di e resumen aki, ta esnan cu banda di nan pension tin un trabao tambe, of un otro entrada di negoshi of algo similar.
Nos ta calcula cu ta alomenos di 25 pa 30 porciento di e pensionadonan ta haci uso di esaki. Na 2008 mi a constata cu e espacio unda e departamento di pension tabata ubica cu awor ta e wachtkamer esey tabata henter e departamento cu tur e trahadornan cu tabata atende ya caba 12 mil pensionado.
Na momento cu tres mil tabata acerca pa e resumen di entrada, e operacion diario di e departamento pa basta dia, mas cu casi dos siman tabata paraliza, cu consecuencianan cu pensionadonan nobo cu mester a otorga nan e luna ey, no por a worde otorga pasobra e departamento tabata tranca.
Na 2009 nos a cuminza cu un proceso di registracion, y tur e personanan cu a acudi SVb pa e resumen di entrada di pension di behez y pension di AWW, nos a registra nan pa asina nos manda tur aña e formulario aki, pa nan. Nos a yega asina leu cu na 2010 y 2011 nos a logra manda e resumen via post pa e personanan aki”, director di SVb a señala.
Ing. Jacobs a sigui splica cu den e proceso aki nan a constata tambe: 1. Cu nan tabata saca e resumen aki den e prome cuartal di e aña pa e pensionadonan pero e aanslag di belasting tabata yega den e di dos mitad di e aña. Kiermen cu e periodo cu SVb tabata manda e resumen y esun cu persona mester a use tabata di un par di luna cu consecuencia cu tabata tin personanan cu mester a bolbe SVb pa pidi e papel aki y e grupo aki tabata basta grandi atrobe y tambe tabata paraliza e funcionamento diario di e departamento, y specialmente e nobonan cu mester a ricibi pension.
“ Nos a cuminza pensa con nos ta bay soluciona e problema e aña aki. Nos tabata bao impresion cu e aña aki atrobe e papelnan di belasting lo a sali e di dos mitad di aña, pero tin cu bisa cu nos a worde sorprendi cu nan a worde saca mas tempran, entre mitad cu final di Maart caba nos a constata nos mes cu a ricibie na cas cu e papel di belasting a sali”, director di SVb a señala.
El a agrega cu e momento ey e tempo tabata cortico pa SVb por a organiza e entrega mediante post.
Na 2011 nan a dicidi cu pa mantene un registro di esnan cu tin mester di dje, tampoco no tabata funciona pasobra no tur hende tabata indica adelanta cu nan mester di dje.
“Na final, aña pasa, nos a manda e tempo ey 14 mil pensionado cu a haya e resumen na cas, y ta un bon cantidad a bin back pasobra e adresnan no tabata cuadra.
Nos tabata pensando kico nos ta bay haci e aña aki y nos a pensa saca esaki mas cerca posible di e periodo cu Belasting saca cu papel di impuesto. Pero door cu nos a worde sorprendi un poco pa cu esey, e organizacion pa entrega nan a tuma tog su tempo, y na e momentonan aki nos tin 16 mil pensionado na Aruba y pa print e formularionan aki ta tuma su tempo”, señor Jacobs a subraya.
El a agrega cu pa un motibo of otro e sistema a laga nan un poco na caya.
E ora ey a tuma e decision pa molestia nan clientenan pa pasa na SVb su oficinanan di pension, y pa nan ta conciente cu esaki tabata un molester y ta bisto cu e no ta bay sosode nunca mas.
“Nos no ta bay entrega e papel aki mas na nos oficina pasobra e grupo di pensionado ta grandi. Nos tin den nos sistema riba 18 mil pensionado, di cual 16 mil ta biba na Aruba y 2 mil ta biba pafo di Aruba. Dieseis mil persona di cual nos calcula cu 4 mil tin necesidad di e papel aki, y pa nan bin cerca nos, nos a mira siman pasa cu el a trece basta congestionamento. Nos a cuminza imprimi e papelnan aki di adelanta pa entrega e persona, pero den esaki tabata tin un eror, y un parti di e resumen a worde imprimi den orden di ID number, y otro parti a worde imprimi den orden alfabetico di fam”, sr. Jacobs a splica.
El a agrega cu pa nan tabata practicamente imposible cuadra un cu otro papel manualmente, y na ultimo ora scoge pa print na e momento mes y esaki ta tuma dos minuut pa cada formulario, si e sistema ta duna, pero nan a confronta cu e situacion cu e sistema a down.
“ Di nos banda mi kier pidi nos disculpa pa esaki, e no ta nos intencion y nos ta bin ta mehorando nos facilidadnan pa nos pensionadonan, y esaki no ta cuadra den e pensamentonan cu nos tin y e servicio cu nos kier brinda nan”, director Jacobs a expresa.
El a duna di conoce cu pa otro aña ta bay manda e formularionan via post, y nan ta desaroyando un programa di pension nobo, pasobra esun cu tin awor tampoco ta duna e resultado pasobra e ta un sistema basa riba internet y e ta cay hopi afo, loke no ta agradable ni pa nos trahadornan cu tin cu hinca e informacion dos biaha, y tampoco pa nos clientenan.
“ Nos ta premira cu pa aki cinco aña, nos ta bay suministra nos clientenan cu ta habil den e mundo cibernetico un password cu nan mes por subi via internet na nos website y nan mes por imprimi nan resumen di entrada pa belasting”, e director di SVb a señala.
