Minister Otmar Oduber:
ORANJESTAD (AAN): Diaranson merdia prome cu Minister Otmar Oduber a biaha pa Hulanda pa sostene diferente reunionnan cu ta regarda industria di turismo crucero, el a comenta riba e aspecto laboral relaciona cu Petro China. Minister Oduber a expresa cu e negociacionnan cu Petro China a bay sumamente positivo y cu Petro China mes a desmenti rumornan cu ta tumando lugar bisando cu nan no lo trece 2000 persona pa labora den e posibel restart di e refineria. Petro China a expresa di ta respeta e cultura y e pais na unda nan ta haci inversion y mas ainda despues cu nan a conoce e operacionnan y equipo cu tin na Aruba, unda cu tin personanan sumamente cualifica laborando den Valero. Despues di a combersa cu Valero, Petro China a keda convenci cu e contratistanan cu tabata labora den Valero lo por ocupa e posicionnan necesario pa un posibel restart di e operacionnan di e refineria.
Durante reunionnan Petro China a indica cu nan lo kier tin algun di nan mesun hendenan laborando y controlando e inversionnan cu nan a haci, pero cu e cantidad lo ta uno hopi limita.
Tambe a indica cu na momento cu nan lo mester busca hendenan for di afor pa haci turnaround, esakinan lo bin for di paisnan cercano manera Curaçao, Bonaire y Trinidad and Tobago, cual lo ta hopi mas benificioso pa e compania. Pa loke ta trata personanan cu lo labora permanentemente den e refineria, Petro China a indica cu lo usa hendenan local mes.
Petro China tin e derecho di trece nan mes un ehecutivonan pa mira riba nan inversionnan pero nan a indica cu esaki lo ta trata di menos cu 20 persona.
